Qirgʻiziston suv resurslaridan samarali foydalanishni yoqlaydi 💧

Qirgʻiziston Respublikasi Prezidenti Sadir Japarov Bishkek shahrida boʻlib oʻtayotgan Mustaqil Davlatlar Hamdoʻstligi Davlat rahbarlari kengashining majlisida soʻzga chiqib, mintaqada suv resurslaridan oqilona va samarali foydalanishga qaratilgan chora-tadbirlar hamda loyihalarni qoʻllab-quvvatlashini ma’lum qildi. Uning ta’kidlashicha, mintaqadagi suv zaxiralarining taxminan qirq foizi aynan Qirgʻiziston hududida shakllanadi va rasmiy Bishkek mintaqani suv bilan ta’minlash borasidagi ulkan mas’uliyatni chuqur anglaydi.

Mintaqadagi suv resurslarining shakllanish zonasiga iqlim oʻzgarishining salbiy ta’siri hamda infratuzilmaning eskirishi hisobga olinib, suv va yer resurslarini boshqarish, arzon va ekologik toza elektr energiyasi ishlab chiqarish hamda iqlim oʻzgarishiga moslashish yoʻlidagi irrigatsiya va energetika loyihalarini oʻz vaqtida amalga oshirish muhimligi qayd etildi. Shuningdek, yashil iqtisodiyot tashabbuslarini ilgari surish va yirik istiqbolli loyihalarni birgalikda davom ettirish zarurligi aytildi.

Sammit doirasida mamlakatning MDHga raisligi ustuvor yoʻnalishlarini amalga oshirish jarayonida iqlim barqarorligini ta’minlash borasida faol choralar koʻrilgani ta’kidlandi. Davlat rahbari xavfsizlik, gumanitar hamkorlik, jumladan 2023-yil rus tili yili deb e’lon qilingani va bu til davlatlararo muloqot vositasi boʻlib qolishiga ishonch bildirdi.

Bundan tashqari, raqamlashtirish sohasi hamkorlikning muhim yoʻnalishlaridan biri sifatida tilga olindi. Qirgʻiziston tomoni tashabbusi bilan ishlab chiqilgan raqamli texnologiyalar toʻgʻrisidagi bayonot loyihasini qoʻllab-quvvatlash soʻraldi.

Juma kuni Bishkek shahrida oʻtayotgan MDH Davlat rahbarlari kengashining ushbu yigʻilishida Rossiya, Ozarbayjon, Belarus, Qirgʻiziston, Tojikiston, Turkmaniston va Oʻzbekiston prezidentlari ishtirok etmoqda. Tashkilotga a’zo boʻlgan Armaniston bosh vaziri Nikol Pashinyan mazkur sammitda qatnashmadi.