🔴 Marsdagi ulkan qum boʻroni

Xitoyning «Tianwen-1» orbital apparati Mars sayyorasida yuzaga kelgan kuchli qum boʻronini muvaffaqiyatli qayd etdi. Mazkur tabiiy hodisa Quyon sistemasidagi eng ulkan togʻ hisoblangan Olimp Mons yaqinida sodir boʻlgani aniqlandi.

Ushbu ulkan boʻron togʻ yonbagʻirlari va uning atrofidagi hududlarni qamrab olgan boʻlib, uni oʻrtacha oʻlchamli MORIC kamerasi 2022-yil yanvar oyida muhrlab olgan. Tasvirni qayta ishlash va jamoatchilikka eʼlon qilish ishlari mutaxassis Andrea Lak tomonidan amalga oshirildi. U oʻz ishida Xitoyning Oy va sayyoralar maʼlumotlarini tarqatish tizimidan olingan xom maʼlumotlardan foydalangan.

Eslatib oʻtamiz, «Tianwen-1» missiyasi 2020-yil iyul oyida fazoga uchirilgan boʻlib, u NASAning «Perseverance» marsohodi Qizil sayyoraga qoʻnishidan biroz oldin, 2021-yil fevral oyida Mars orbitasiga yetib kelgan edi. Andrea Lak shuningdek, mazkur qum boʻronini boshqa raqursdan koʻrsatuvchi Marsning yarim oy shaklidagi suratini ham qayta ishlab chiqdi. Ushbu yuqori sifatli fotosuratni 9711x3800 piksel oʻlchamda maxsus havola orqali yuklab olish imkoniyati mavjud.

Xitoyning ushbu kosmik dasturi doirasida Qizil sayyoraga quyosh energiyasida ishlaydigan «Zhurong» marsohodi ham yetkazib berilgan edi. Bugungi kunga kelib, mazkur marsohud oʻzining asosiy vazifalarini toʻliq bajarib boʻlgan va hozirda Utopia Planitia keng tekisligida kengaytirilgan ilmiy-tadqiqot ishlarini davom ettirmoqda.