"Ready or Not" xakerlar nishonida! 🚨

2023 yil dekabr oyida to'liq talqini taqdim etilgan "Ready or Not" o'yini so'nggi davrlardagi eng muvaffaqiyatli loyihalardan biri sifatida e'tirof etilgandi. VOID Interactive tomonidan ishlab chiqilgan ushbu taktik birinci shaxs otishma janridagi realistik loyiha foydalanuvchilar o'rtasida katta shuhrat qozongandi. Biroq so'nggi xabarlarga ko'ra, mazkur kompaniya yirik kiberhujum qurboniga aylangan va uning serverlaridan ulkan hajmda ma'lumotlar sizib chiqqan.

Insider Gaming tarqatgan ma'lumotlarga ko'ra, xavfli kiberhujum shu yilning mart oyida sodir etilgan. Hozircha ushbu jinoyatni amalga oshirgan guruh nomi sir saqlanmoqda va hujum qanday yo'l bilan uyushtirilgani haqida ham aniq ma'lumot mavjud emas. VOID Interactive studiyasi esa yuzaga kelgan vaziyat yuzasidan hozircha hech qanday rasmiy izoh berishgani yo'q.

Hujum natijasida jami 2,1 millionga yaqin fayl va 4 terabaytdan ortiq axborot o'g'irangani aytilmoqda. Eng muhimi, "Ready or Not" o'yinining to'g'ridan-to'g'ri manba kodlari hamda uning kelgusidagi konsol versiyalariga tegishli kodlar ham zarar ko'rganlar qatorida. Xususan, manbalar PS4 uchun mo'ljallangan ishchi versiya suratlari hamda Xbox One, Series X/S va PS5 platformalariga oid ma'lumotlar qo'lga kiritilganini tasdiqlamoqda.

Ushbu noxush vaziyat fonida o'yinchilarni xotirjam qiladigan yagona ijobiy jihat ham mavjud. Tarqatilgan xabarlarga ko'ra, kiberhujum oqibatida na "Ready or Not" loyihasi foydalanuvchilarining va na VOID Interactive xodimlarining shaxsiy ma'lumotlari sizib chiqqan. Barcha o'g'irlangan fayllar faqatgina o'yinning o'ziga taalluqli ekanligi bildirildi.