Netflix reklamli tarifi 70 million foydalanuvchiga yetdi 📈

Netflix kompaniyasi reklama ko‘rsatilishini o‘z ichiga olgan obuna xizmati global miqyosda 70 million foydalanuvchiga yetganini rasman ma’lum qildi. Ushbu ko‘rsatkich joriy yilning may oyida e’lon qilingan raqamlarga qaraganda ancha yuqoriligini ko‘rsatmoqda.

Reklamali tarif rejasining bunday tez sur’atlar bilan o‘sishi mutaxassislar uchun kutilmagan holat bo‘lmadi. Xorijiy bozorlar uchun mazkur arzonroq tarif yanada yaxshiroq tasvir sifatini hamda bir vaqtning o‘zida ikkita qurilmada tomosha qilish imkoniyatini taqdim eta boshladi.

Streaming gigantining ta’kidlashicha, foydalanuvchilar platformada kuniga o‘rtacha ikki soat vaqt sarflamoqda. Bu esa xizmatga bo‘lgan qiziqishning yuqori darajada saqlanib qolayotganini ko‘rsatadi.

Eslatib o‘tamiz, kompaniya o‘tgan oydagi moliyaviy hisobot natijalariga ko‘ra, o‘z bazasini yana 5 million obunachiga ko‘paytirganini va umumiy global obunachilar soni 282.7 million nafarga yetganini e’lon qilgan edi.