🦷 Stressni aniqlaydigan aqlli tish ipi yaratildi

Taft universiteti tadqiqotchilari inson organizmidagi stress darajasini aniqlashga mo‘ljallangan o‘ziga xos tish ipini yaratishdi. Tashqi ko‘rinishidan oddiy gigiyenik vositani eslatuvchi ushbu yangi qurilma murakkab mikroflyuid tizimi hamda maxsus elektrokimyoviy datchik bilan jihozlanganligi bilan ajralib turadi.

Mazkur gadjetdan foydalanish jarayonida so‘lak tarkibidagi kortizol, ya'ni stress gormoni miqdori tahlil qilinadi. Ushbu gormon darajasining doimiy ravishda yuqori bo‘lishi ortiqcha vazn to‘planishi, qandli diabet hamda hatto Altsgeymer kasalligi kabi jiddiy muammolar bilan bog‘liq bo‘lishi mumkin. Olimlarning ta'kidlashicha, yangi usulning aniqligi laboratoriyada o‘tkaziladigan ELISA testlari bilan deyarli bir xil darajada bo‘lib, tahlil natijasini tayyorlash uchun atigi 10 daqiqa vaqt talab etiladi.

Texnologiyaning asosiy qismini kortizolni tutib qolishga mo‘ljallangan "molekulyar izlar"ga ega polimer tashkil etadi. So‘lak datchikka tushganda, gormon bilan bog‘langan molekulalar maxsus elektr signalini hosil qiladi va bu ma'lumot darhol smartfonga uzatiladi. Bunda so‘lakdagi kortizol qanchalik ko‘p bo‘lsa, signal ham shunchalik kuchliroq chiqadi.

Dastlabki rejalarga ko‘ra, bunday aqlli tish ipi oddiy tish tozalash jarayoni kabi kundalik odat tusiga kirishi mumkin. Odamlar ushbu qurilma yordamida o‘zlaridagi stress darajasini real vaqt rejimida kuzatib borish hamda hayot tarziga zarur o‘zgarishlar kiritish imkoniyatiga ega bo‘ladilar, jumladan, kofeindan foydalanishni kamaytirish orqali salomatligini yaxshilashi mumkin bo‘ladi.