🎮 Apple qurilmalari uchun yangi oʻyinlar!

Apple kompaniyasi oʻtgan oyda iPhone 18 Pro va iPhone 18 Pro Max smartfonlarini namoyish etganida, mobil oʻyinlar yoʻnalishidagi yangiliklarga unchalik eʼtibor qaratmagan edi. Biroq dushanba kuni eʼlon qilingan xabarga koʻra, App Store doʻkonining Mustaqil oʻyinlar haftaligi doirasida Apple telefonlari va planshetlari uchun mashhur indie oʻyinlarning yangi turkumi kelishi maʼlum boʻldi.

Mazkur dastlabki yettita yangi oʻyinlar qatoriga No Man’s Sky, Sifu va Vampire Crawlers kabi loyihalar kiritildi. Ushbu oʻyinlar iPhone va iPad qurilmalarida ishlaydi va ularni doʻkondan sotib olish mumkin. Istisno tariqasida, Hello Games tomonidan ishlab chiqilgan va 2016-yilda ilk bor chiqarilgan No Man’s Sky kosmik tadqiqot oʻyini 28-oktabr kuni sotuvga chiqariladi.

Eʼlon qilingan yangi indie oʻyinlar roʻyxatiga Sifu (8 dollar), Vampire Crawlers (10 dollar), No Man’s Sky (20 dollar), Little Kitty, Big City (10 dollar), 9 Kings (9 dollar), Dome Keeper (10 dollar) hamda Yes, Your Grace 2: Snowfall (5 dollar) kabi loyihalar kiritildi. Ularning orasida eng eʼtiborlisi No Man’s Sky hisoblanadi. Oʻyin ilk chiqqan vaqtida tanqidlarga uchragan boʻlsa-da, yaratuvchilar oʻn yil davomida uni muntazam yangilab, oʻyinchilar sonini oshirishga muvaffaq boʻlishdi.

Hello Games maʼlumotiga koʻra, mazkur kosmik oʻyinni iPhone 11 va undan keyingi rusumdagi smartfonlarda hamda uchinchi avlod iPad Air va undan yangiroq planshetlarda oʻynash mumkin. iPhone egalari sensorli ekran yoki kontrollerdan, iPad foydalanuvchilari esa xohishga koʻra klaviatura va sichqonchadan foydalanish imkoniyatiga ega. Ushbu oʻyinlar Apple Arcade xizmatiga kirmaydi, biroq ayrim loyihalar uchun bepul sinov muddatlari mavjud.