Ozarbayjon Turkiya va Isroil bilan hamkorlikda davom etmoqda 🇦🇿

Ozarbayjon Mudofaa sanoati vaziri Madat Quliyev Boku shahrida bo'lib o'tayotgan IV Ozarbayjon xalqaro mudofaa ko'rgazmasi ADEX hamda XIII Xalqaro ichki xavfsizlik, muhofaza va qutqaruv uskunalari Securex Caspian ko'rgazmalari doirasida APA-Economics nashriga intervyu berdi. O'z chiqishida vazir mamlakat xorijiy hamkorlar bilan aloqalarni davom ettirayotganini alohida ta'kidlab o'tdi.

Jumladan, Ozarbayjon Turkiya va Isroil kompaniyalari bilan hamkorlikni izchil davom ettirayotgani ma'lum qilindi. Vazir Madat Quliyev o'tkazilayotgan xalqaro ko'rgazmalarning ahamiyatiga ham alohida to'xtalib o'tdi.

Xususan, Turkiya Respublikasi bilan birgalikda kelgusi o'n-o'n besh yilga mo'ljallangan istiqbolli qurol-yarog'larni yaratish ustida ish olib borilayotgani aytildi. Vazirning qayd etishicha, tomonlar faqat bugungi kun bilan cheklanib qolmay, kelajakka, hatto yigirma yil oldinga nazar tashlamoqda.

Mazkur strategik yondashuv va kelajakka mo'ljallangan rejalar Ozarbayjon rahbariyati tomonidan oldinga qo'yilgan muhim vazifalardan biri ekanligi ta'kidlandi. Ko'rgazma doirasidagi bunday uchrashuvlar mudofaa sanoati yo'nalishidagi xalqaro aloqalarni yanada mustahkamlashga xizmat qiladi.