🏫 Maktablarda kadrlar va rahbarlar inqirozi!

Avstriya ta'lim tizimida o‘qituvchilar yetishmasligidan tashqari, maktab rahbarlarining ham ommaviy ravishda nafaqaga chiqishi yoki boshqa kasblarga o‘tib ketishi bilan bog‘liq jiddiy muammo yuzaga kelmoqda. Hisob-kitoblarga ko‘ra, yaqin besh yil ichida majburiy maktablarda 1400 taga yaqin, yuqori bosqich maktablarida esa 200 dan ortiq direktorlik lavozimlari bo‘sh qolishi mumkin. Eng achinarli jihati, ushbu bo‘sh o‘rinlarga deyarli ariza topshirilmayapti va natijada mamlakatdagi har to‘rtinchi maktab rahbarrisiz qolish xavfi ostida turibdi.

Mutaxassislarning ta'kidlashicha, ko‘plab direktorlar hatto oddiy o‘qituvchilik lavozimiga qaytish uchun ariza bermoqda. Buning asosiy sabablaridan biri sifatida ma'muriy ishlarning markazlashmagani va ularning bevosita direktorlar zimmasiga yuklatilgani ko‘rsatilmoqda. Ayni paytda pedagogik masalalar markazlashgan holda belgilab berilmoqda, bu esa boshqaruvda qiyinchiliklarni keltirib chiqarmoqda.

Kadrlar yetishmayotgan bir paytda, yordam berishni istagan tajribali nafaqadagi direktorlar va sobiq o‘qituvchilarning murojaatlari ta'lim boshqarmalari tomonidan rad etilmoqda. Mas'ullar mavjud kuchlar yetarli ekanini bildirar ekan, amalda esa talabalar yoki mutaxassis bo‘lmagan boshqa soha vakillariga ustunlik berilayotgani ma'lum bo‘ldi.

Shu bilan birga, ayrim ijobiy o‘zgarishlar ham kuzatilmoqda. Xususan, Vena shahridagi boshlang‘ich maktablarning birida o‘qituvchisiz qolgan sinflarga tezkorlik bilan yangi pedagoglar biriktirildi. Maktab ma'muriyati va ta'lim boshqarmasining sa'y-harakatlari tufayli ota-onalarni tashvishga solgan muammo qisman bartaraf etilib, sinflarga o‘qituvchilar tayinlandi.