💻 Microsoft NVIDIA daromadining qariyb 20%ini ta'minladi

NVIDIA kompaniyasining 10-Q shaklidagi choraklik hisoboti yaqinda e'lon qilindi va UBS moliya tashkiloti uning tafsilotlarini o'rganib chiqdi. Unga ko'ra, o'tgan chorakda ikki yirik mijozning har biri NVIDIA daromadining 10%dan ko'prog'ini ta'minlagan. Amerika kompaniyalari moliyaviy hujjatlarida bunday yuqori daromad konsentratsiyasi biznes uchun muayyan xavflarni keltirib chiqarishi sababli alohida qayd etiladi.

Aniq ulushlar miqdori to'g'ridan-to'g'ri ko'rsatilmagan bo'lsa-da, UBS tahlilchilari bu yirik mijozlardan biri ulkan hajmda hisoblash tezlatkichlarini xarid qiluvchi Microsoft korporatsiyasi ekanligiga iishonishmoqda. Ularning baholashicha, o'tgan yili Microsoft NVIDIA kompaniyasi butun daromadining naq 19%ini ta'minlagan.

Hozirgi kunda NVIDIA o'z daromadining taxminan 90% qismini server sektoridan oladi, shuning uchun aynan shu yo'nalish kompaniya biznesiga eng kuchli ta'sir ko'rsatmoqda. Ikkinchi yirik mijozning kimligi hozircha oshkor etilmagan, biroq mutaxassislar fikricha, u ham bulutli xizmatlar ko'rsatish bilan shug'ullanuvchi yirik provayder bo'lishi mumkin.