Telegram'da komissiyasiz kriptohamyon ishga tushdi 🪙

Telegram messendjerida foydalanuvchilarga to'g'ridan-to'g'ri chatlar orqali raqamli aktivlarni o'tkazish imkonini beruvchi yangi «Dengi» kriptohamyoni paydo bo'ldi. Ushbu xizmat ilgari mavjud bo'lgan va yaqinda Walt deb qayta nomlangan uchinchi tomonning Wallet hamyoni o'rnini egalladi. Shuni ta'kidlash kerakki, Walt hozircha yangi xizmat bilan parallel ravishda faoliyat yuritishda davom etmoqda.

Yangi «Dengi» hamyoni non-kastodial tamoyil asosida ishlaydi, ya'ni barcha mablag'lar va maxfiy kalitlar ustidan nazorat faqat foydalanuvchining o'zida qoladi. Xavfsizlikni yanada kuchaytirish maqsadida Face ID texnologiyasi yoki alohida kod-parol o'rnatish imkoniyati ko'zda tutilgan. Xizmat doirasida har kuni ilk beshta o'tkazma uchun komissiya undirilmaydi. Barcha amaliyotlar TON blokcheyni tarmog'ida amalga oshiriladi, GRAM (avvalgi Toncoin) tokenlarini boshqa foydalanuvchilarga yuborish esa minimal vaqt talab etishi aytilmoqda. Shuningdek, interfeysda QR-kod va hamyon manzili orqali hisobni to'ldirish funksiyasi, NFT hamda kolleksion aktivlar bo'limi ham mavjud.

Hisobga kirishni tiklash uchun o'n ikki so'zdan iborat maxfiy seed-frorazadan foydalaniladi. Bundan tashqari, Telegram kalitning shifrlangan zaxira nusxasini saqlash usulini ham taklif etadi. Bunda kalit uch qismga bo'linib, dunyoning turli qit'alarida saqlanadi va ularni faqat foydalanuvchining o'z qurilmasidagina birlashtirish mumkin. Bu yondashuv messenjerning o'ziga mablag'lar ustidan nazoratni bermasdan turib kirishni tiklash imkonini beradi.

«Dengi» hamyoni eski hamyonda qolgan mablag'larni avtomatik ravishda taniydi, yangi interfeys orqali kriptovalyuta sotib olish jarayoni ham Walt xizmati orqali amalga oshiriladi. Yangi funksiya foydalanuvchilarga bosqichma-bosqich taqdim etilayotgani sababli hozircha barchaga birdek ochilmagan. Unga ega bo'lish uchun ilovani 13.0 yoki undan keyingi versiyagacha yangilash zarur. Agar bo'lim sozlamalarda ko'rinmasa, boshqa foydalanuvchi yordamida chat orqali 0,1 GRAM jo'natish yoki TON tarmog'idagi boshqa manzil orqali balansni mustaqil to'ldirib, ilovani qayta ishga tushirib ko'rish tavsiya etiladi.