Galaxy S25 Edge chidamlilik sinovidan o'tdi 📱

Mashhur YouTube blogeri JerryRigEverything o'ta yupqa dizaynga ega Galaxy S25 Edge smartfonini qattiq chidamlilik sinovlaridan o'tkazdi. Mutaxassis qurilmani ikki tomonga burab ko'rdi va telefon o'zining struktura yaxlitligini to'liq saqlab qolgan holda sinovdan muvaffaqiyatli o'tdi. Sinov jarayonida faqatgina orqa panel korpusdan biroz ajralib chiqqani sezildi, biroq bunday yupqa qurilma uchun qayd etilgan bu natija juda ijobiy baholandi.

Smartfonning ekran qismida qo'llanilgan Corning Gorilla Glass Ceramic 2 shishasi ham sinovdan o'tkazildi. Mohs sertlik o'lchov shkalasiga ko'ra, displeyda 6-darajada dastlabki tirnalishlar paydo bo'lib, 7-darajaga kelib chuqurroq o'yiqlar hosil bo'lgani aniqlandi. Ushbu ko'rsatkich ko'pchilik zamonaviy telefonlarga o'xshash bo'lib, mazkur himoya oynasi bu borada o'ziga xos katta farq ko'rsatmadi.

Shuningdek, sinov davomida pichoq yordamida qurilmaning tugmalari osonlikcha joyidan chiqib ketishi aniqlandi. Biroq, kamera modullari va linzalari korpusga juda mustahkam o'rnatilgani ma'lum bo'ldi. Eng hayratlanarli jihatlardan biri, smartfon ekraniga o'n soniyalar emas, naqd 30 soniya davomida olov tutdirilganda ham unga hech qanday zarar yetmagani bo'ldi. Odatda ko'pchilik telefonlar ekranlari bu vaqt ichida olov ta'siridan shikastlanishi qayd etiladi.

Umuman olganda, Galaxy S25 Edge modelining pishiqligi va mustahkamligidan shubha qilgan foydalanuvchilar uchun ushbu qattiq sinovlar uning yuqori darajada bardoshli ekanini amalda ko'rsatib berdi.