Google yangi EmbeddingGemma 2 modelini taqdim etdi 🤖

Google korporatsiyasi cheklangan resurslarga ega qurilmalarda ishlashga mo‘ljallangan yangi avlod EmbeddingGemma 2 multimodal sun'iy intellekt modelini rasman tanishtirdi. Ushbu texnologiya foydalanuvchilarga matnli so‘rovlar orqali uzun audio yozuvlar yoki videolar ichidan kerakli lahzalarni oson topish imkonini beradi.

Mazkur sun'iy intellekt modeli matn, tasvir, ovoz, video va dasturlash kodlari kabi turli xil ma'lumot turlarini yagona fazoda birlashtiradi. Buning natijasida turli formatdagi kontentlar o‘zaro bog‘lanib, fayllarni qurilmadan tashqariga chiqarmagan holda matn orqali aniq audio yoki video parchasini qidirib topish imkoniyati yaratiladi.

Gemma 4 arxitekturasi asosida yaratilgan ikkinchi avlod modeli 740 million parametrni o‘z ichiga oladi. U nisbatan kam quvvatli gadjetlarda ham bemalol ishlay oladi. Masalan, Pixel 11 Pro qurilmasida u faqat matn rejimida taxminan 191 MB, barcha multimodal imkoniyatlari yoqilganda эsa 567 MB atrofida tezkor xotirani band qiladi.

Yangi model 8 000 tokenlik kontekst oynasiga ega bo‘lib, bu ko‘rsatkich avvalgi versiyadan to‘rt barobar kattadir. Bir martalik jarayonda 5,5 daqiqagacha bo‘lgan audio, 29 ta rasm yoki 58 ta video kadrni, jumladan, ularning turli kombinatsiyalarini qayta ishlash mumkin.

Google maxfiylik masalasiga ham alohida e'tibor qaratgan. Ma'lumotlar qurilmaning o‘zida qayta islangani sababli, qidiruv ilovalari va RAG tizimlari axborotni tashqi serverlarga jo‘natmasdan faoliyat yuritadi. EmbeddingGemma 2 qurilmadagi ma'lumotlarni topib beradi, boshqa sun'iy intellekt modeli esa ularni tahlil qilib javob tayyorlaydi.

Dasturchilar uchun mazkur model Apache 2.0 lisenziyasi asosida taqdim etilgan bo‘lib, uni Hugging Face hamda Kaggle platformalaridan yuklab olish mumkin. Shuningdek, kompaniya uni sinab ko‘rmoqchi bo‘lganlar uchun maxsus qo‘llanma va hujjatlarni ham e'lon qilgan.