⚡️ Yashil energetikaga "super ruxsat" beriladi

Turkiya energetika sohasidagi sarmoyalarni keskin tezlashtirishga qaratilgan muhim qonun loyihasini yaqin kunlarda muhokamaga kiritishga hozirlik ko'rmoqda. Uchinchi Enerji Saqlash Tizimlari Sammitida so'zga chiqqan vazir o'rinbosari Tancanning ta'kidlashicha, xususan, saqlash imkoniyatiga ega quyosh va shamol elektr stansiyalarini hayotga tatbiq etishni jadallashtirish uchun "super ruxsat" deb nomlangan yangi me'yoriy hujjatlar ustidagi ishlar yakuniy bosqichga yetgan. Mazkur torfta qonun loyihasi shu hafta ichida parlamentga yuborilishi kutilmoqda.

Joriy etilishi rejalashtirilayotgan ushbu model tufayli qayta tiklanuvchi energiya obyektlari bo'yicha o'tkaziladigan tenderlar va tasdiqlash jarayonlari hozirgi 42 oylik muddatdan 3 oydan 6 oygacha bo'lgan qisqa davrga tushiriladi. Hozirda bir nechta turli idoralar, jumladan Atrof-muhit, shaharsozlik va iqlim o'zgarishi, G'azna va moliya hamda Madaniyat va turizm vazirliklari o'rtasida bo'lingan imzo qo'yish vakolatlari endilikda Energetika bozori tartibga solish kengashi hamda Energetika va tabiiy resurslar vazirligida jamlanadi. Natijada kompaniyalar ko'plab muassasalardan alohida izn olish zaruratidan xalos bo'lib, yerlarni davlat tasarrufiga olish va atrof-muhitga ta'sirni baholash kabi amaliyotlarni ancha tezroq yakunlaydi.

Tadbirda mamlakatning 2035 yilga mo'ljallangan strategik maqsadlari ham ma'lum qilindi. Unga ko'ra, joriy yil aprel oyi oxiri holatiga ko'ra Turkiyaning umumiy elektr ishlab chiqarish quvvati 118 668 megavattni tashkil etib, uning 60,6 foizi yashil energiya manbalariga to'g'ri kelmoqda. 2035 yilga borib bu ko'rsatkichni 227 200 megavattga, umumiy qayta tiklanuvchi quvvatni esa 160 200 megavattga chiqarish ko'zda tutilgan.

Xususan, kelgusi yillarda shamol energetikasini 43 100 megavatt va quyosh energetikasini 76 900 megavattga yetkazish orqali jami 120 ming megavattlik yangi quvvat yaratish rejalashtirilgan bo'lib, bu yo'nalishda taxminan 80 milliard dollarlik investitsiya muhiti shakllantirilishi ko'zlangan. Shuningdek, mamlakatda elektr energiyasini saqlash tizimlarini kengaytirish choralari ham ko'rilmoqda. 2035 yilga qadar 7,5 gigavattlik saqlash quvvatlarini ishga tushirish rejalashtirilgan bo'lib, shu paytgacha tegishli idoralar tomonidan o'n minglab megavatsaatlik quyosh va shamol loyihalari uchun dastlabki hamda ishlab chiqarish litsenziyalari berib bo'lingan.