Intel protsessorlar narxini oshirdi 📈

Intel kompaniyasi o'z protsessorlarining yetkazib berish narxlarini joriy yilning 1-sentabridan boshlab oshirgani ma'lum bo'ldi. Tayvanning Commercial Times iqtisodiy gazeta ma'lumotlariga tayanib tarqatilgan xabarlarga ko'ra, narxlar modellarga qarab turlicha ko'tarilgan. Eng katta o'zgarishlar katta integratsiyalashgan grafik blokiga ega kuchli Panther Lake protsessorlariga taalluqli bo'lib, ularning narxi 15 dan 20 foizgacha qimmatlashgan.

Narxlarning bunday farqli oshishiga ushbu chip ishlab chiqarishning murakkabligi sabab bo'lishi mumkin. Intel Panther Lake protsessorining hisoblash qismini o'zining 18A texnologiyasi asosida ishlab chiqarsa, grafik qismi TSMC kompaniyasining N3E jarayonida yaratiladi. Shuningdek, Meteor Lake va Arrow Lake modellari uchun narxlar 5 dan 10 foizgacha, Alder Lake hamda Twin Lake kabi eski platformalar uchun esa 10 dan 20 foizgacha qimmatlashgani xabar qilingan.

Narxlarning ko'tarilishi arzon mini-kompyuterlar va ofis qurilmalari bozoriga ham ta'sir ko'rsatishi mumkin. Chunki ushbu qurilmalarda ko'pincha Alder Lake va Twin Lake kabi tejamkor protsessorlar qo'llaniladi. Biroq, ishlab chiqaruvchilar qo'shimcha xarajatlarni to'g'ridan-to'g'ri oxirgi iste'molchilarga to'liq yuklash yoki yuklamasligi hozircha noma'lum, chunki yakuniy narxga boshqa ko'plab komponentlar ham ta'sir qiladi.

Mazkur hisobotda boshqa yirik chip ishlab chiqaruvchilar ham tilga olingan. Xususan, Qualcomm kompaniyasi ham 1-oktabrdan boshlab Snapdragon X va Snapdragon X2 Elite kabi kompyuter platformalari narxini 10 foizga oshirgani aytilmoqda. Ushbu chip ishlab chiqaruvchi ham TSMC quvvatlariga bog'langan. Shu bilan birga, AMD kompaniyasi ham o'zining ayrim Ryzen va EPYC server protsessorlari narxini o'zgartirishi kutilmoqda, ammo bu boradagi aniq tafsilotlar hali tasdiqlanmagan.