Samsung aqlli soatlari uchun yangi texnologiya ⌚

Samsung kompaniyasi aqlli soatlar uchun qon bosimini o‘lchash imkoniyatlarini yanada yaxshilash ustida ish boshlagani ma’lum bo‘ldi. AQSh patent idorasiga taqdim etilgan hujjatlar janubiy koreyalik ishlab chiqaruvchi o‘z taqiluvchi gadjetlarida arterial bosimni o‘lchash vositalarini yangi bosqichga olib chiqishni rejalashtirayotganini ko‘rsatadi. Hozirgi kunda kompaniyaning Galaxy Watch7 kabi soatlari Samsung Blood Pressure ilovasi orqali noinvaziv usulda qon bosimini aniqlash imkoniyatiga ega. Ushbu tizim foydalanuvchining sistolik, diastolik qon bosimi hamda puls ko‘rsatkichlarini taqdim etishga qodir.

Qurilma optik signallarni qayd etish uchun fotopletizmogramma datchigidan foydalanadi va shu asosda taxminiy natijani hisoblab chiqaradi. Shunga qaramay, mazkur datchikni maxsus qon bosimi manjeti yordamida kalibrlash talab etiladi. Xususan, yarim soat ichida uch marta o‘lchov amalga oshirilishi kerak va kompaniya foydalanuvchilarga har 28 kunda kalibrlashni takrorlashni tavsiya qiladi. Shu bilan birga, Samsung ushbu o‘lchovlar tibbiy tashxis qo‘yish uchun mo‘ljallanmagani va foydalanuvchilar shifokor maslahatiga murojaat qilishlari kerakligi haqida ogohlantiradi.

Patent hujjatlarida biologik signallardan foydalanishdagi asosiy muammolardan biri tilga olingan. Unga ko‘ra, sistolik va diastolik bosim ko‘rsatkichlari bir-biridan farqli tezlikda o‘zgarishi yoki mustaqil harakatlanishi natijasida xatoliklar yuzaga kelishi mumkin. Bu muammoning yechimi sifatida Samsung bir nechta turdagi signallardan, jumladan PPG, elektrokardiografiya, elektromiyografiya va ballistokardiografiyadan birgalikda foydalanishni taklif qilmoqda.

Joriy yil boshida Bloomberg nashriga bergan intervyusida Samsung mobil salomatlik bo‘limi rahbari Hon Pak kompaniya qon bosimini o‘lchashning yangi texnologiyalari ustida ishlayotganini tasdiqlagan edi. Mazkur yangiliklar qon bosimi manjeti yordamida kalibrlash zaruriyatini bartaraf etish hamda yuqori qon bosimi yoki boshqa yurak-qon tomir muammolarini erta aniqlash uchun uzluksiz monitoring tizimini qo‘shishni o‘z ichiga olishi mumkin. Biroq ushbu ilg‘or texnologiyalar Samsung aqlli soatlariga qachon kelib tushishi hozircha noma’lumligicha qolmoqda.