Yangi og'riqsizlantiruvchi vosita 💊

Tibbiyot sohasida yangi davr boshlanishi mumkin, chunki tadqiqotchilar organizm bo'ylab butunlay tarqalib ketmaydigan o'ziga xos dori vositasini ishlab chiqishdi. Odatdagi og'riqsizlantiruvchi dorilar butun tana bo'ylab ta'sir ko'rsatib, asablarni tinchlantirgan bo'lsa, yangi yaratilgan dori to'g'ridan-to'g'ri og'riq sababiga qarshi kurashadi. Ushbu yangi ishlanma qaramlik keltirib chiqarmasligi bilan ham alohida ahamiyatga ega.

Xalqaro tadqiqotchilar guruhi maxsus kimyoviy reaksiyaga asoslangan holda surunkali og'riqlarni mahalliy ravishda bartaraf etishga qodir birikmani yaratishdi. Ushbu turdagi dorilar organizmga tushgach, o'ziga xos sharoitga duch kelmaguncha nofaol holatda qoladi. Bu esa dorining aynan muammoli hududga yetib borishini ta'minlab, uning samaradorligini oshiradi.

Tadqiqot mualliflaridan biri, Adelaida universiteti professori Endryu Abellning ta'kidlashicha, mazkur birikma organizmdagi faol kislorod shakllari, xususan, vodorod peroksidi va peroxinitrit bilan kimyoviy reaksiya orqali faollashadi. Bunday moddalar doimiy og'riq joylarida ko'p miqdorda topilib, boshqa to'qimalarda uchramaydi. Natijada dori tanada nofaol tarzda aylanib yuradi va faqat og'riq o'chog'iga yetganda ishga tushadi.

Mavjud dorilar ko'pincha og'riq signallarini yuboruvchi asablar faoliyatini pasaytiradi va ko'pchilikka yordam bermaydi. Yangi dori esa og'riq signallarini keltirib chiqaruvchi molekulalar sonini kamaytirish orqali muammoning ildiziga ta'sir qiladi. Hozirgi vaqtda tadqiqotchilar ushbu birikmani insonlardagi sinovlardan o'tkazish ustida ishlamoqda.