XKSda havo sizib chiqishi kuchaydi 🛰️

Xalqaro kosmik stansiya bortida havo sizib chiqishi bilan bog'liq muammo jiddiylashib bormoqda. O'tgan yilning sentyabr oyida astronavtlar stansiyada unchalik katta bo'lmagan havo yo'qotilishini payqashgan edi. O'shanda muammo o'ta kichik bo'lgani bois unga alohida e'tibor qaratilmagan. Biroq keyinchalik havo chiqishi tezligi oshgani xavotirlarni keltirib chiqarmoqda. Kosmik fazo sharoitida bunday aniq nuqson o'rnini topish juda murakkab vazifa ekanligi ta'kidlanmoqda.

Mutaxassislarning fikricha, kosmik stansiya korpusidan oz miqdorda havo chiqib ketishi odatiy holatlarga kiradi. Muhandislarning barcha sa'y-harakatlariga qaramay, kameralar qobig'ida ma'lum nuqsonlar mavjud va uni yuz foiz germetik qilish amalda imkonsiz. Shu sababli, 2019 yilning sentyabrida aniqlangan va ruxsat etilgan me'yordan biroz yuqori bo'lgan bu holat tanqidiy deb qabul qilinmagan edi. O'sha paytda astronavtlarga boshqa vazifalar yuklatilgan bo'lib, ikkinchi darajali muammoni hal qilishga vaqt topilmagan.

Joriy yilning avgust oyidan boshlab esa havo stansiyani ancha tezroq tark eta boshladi. Shunga qaramay, NASA vakillari hozirgi vaqtda astronavtlar hayotiga xavf yo'qligini ma'lum qilishdi. Lekin vaziyatning hozirgi sur'ati saqlanib qolsa, ekipaj a'zolari uchun jiddiy xavflar yuzaga kelishi mumkin.

Yuzaga kelgan vaziyat tufayli uch nafar ekipaj a'zosi — bitta amerikalik va ikki nafar rossiyalik havo sizib chiqishini bartaraf etish bo'yicha ko'rsatma oldi. Kosmonavtlar bir haftadan buyon qidiruv ishlarini olib borayotganiga qaramay, havo qaysi nuqtadan chiqib ketayotganini topa olishmadi. Hozirgi paytda stansiyadagi barcha lyuklarning holati faol ravishda o'rganilmoqda.