Qualcomm noutbuk protsessorlarida muammolar 💻

Qualcomm kompaniyasi bir muddat avval serverlar uchun protsessorlar ishlab chiqarish maqsadida tashkil etilgan Nuvia kompaniyasini sotib olgan edi. Keyinchalik bu texnologiya Qualcomm tomonidan noutbuklar uchun mo'ljallangan yangi ARM arxitekturali protsessorlarni yaratishga yo'naltirildi. Mazkur yangi protsessorlarda qo'llanilishi rejalashtirilgan Oryon yadrolari bozordagi mavjud muqobil yechimlardan ustun kelishi kutilgandi. Biroq, so'nggi ma'lumotlarga ko'ra, energiya boshqaruvi tizimidagi ayrim muammolar sababli ushbu mahsulotni bozorga chiqarish biroz ortga surilmoqda.

Taniqli tahlilchi Charli Demerjianning ta'kidlashicha, yuzaga kelgan qiyinchiliklar energiya samaradorligining pastligi bilan bog'liq. Gap shundaki, mazkur protsessorlarda smartfonlar uchun mo'ljallangan PMIC (Power Management Integrated Circuits) ya'ni energiya boshqaruvi integral sxemalari ishlatilgan. Natijada protsessor noutbuklar talab qiladigan darajadagi energiya tejamkorligiga ega emas va uni boshqa apparat ta'minoti bilan moslashtirishda moslik muammolari kuzatilmoqda.

Bunday PMIC elementlari qimmat turishi bilan birga qimmatroq yuqori zichlikdagi plata talab qiladi. Bitta sxema noutbukning quvvat talabini qondira olmagani uchun bir nechta shunday qismlardan foydalanishga to'g'ri kelmoqda va bu umumiy xarajatlarni yanada oshirmoqda. Oqibatda kompyuter ishlab chiqaruvchi kompaniyalar ushbu protsessorlarni o'z qurilmalariga o'rnatishdan ehtiyotkorona qochishmoqda. Mazkur qo'shimcha xarajatlarni qoplash uchun esa Qualcomm ishlab chiqaruvchilarga moliyaviy kompensatsiya taklif qilib, o'z protsessorlarini arzonroq narxlarda sotayotgani aytilmoqda.

Yaqin kunlarda Nuvia Oryon yadrolari bilan jihozlangan yangi protsessor rasman taqdim etilishi kutilmoqda. Qualcomm bu muammolarni qanday hal qilgani va mazkur yechimga ega noutbuklar bozorga qanday hajmda yetkazib berilishi vaqt o'tishi bilan ma'lum bo'ladi.