188 mlrd dollarlik xavfli mablag'lar 🔍

Blokcheyn tahlil kompaniyasi bo'lgan Global Ledger o'zining "High-Risk Benchmark" hisobotida 2021 va 2025 yillar oralig'ida 99 ta kriptovalyuta birjasida jami 187,75 milliard dollarlik yuqori xavfli mablag'lar mavjudligini aniqladi. Ushbu tadqiqot Bitcoin, Ethereum hamda Tron tarmog'idagi USDT bo'yicha amalga oshirilgan 36,28 trillion dollarlik kirish va chiqish amaliyotlarini o'rganib chiqdi.

Hisobotga ko'ra, tekshirilgan umumiy summa doirasida birjalarga shubhali manbalardan 90,55 milliard dollar kelib tushgan va xavfli manzillarga 97,21 milliard dollar chiqib ketgan. Aniqlanishicha, barcha shubhali kirimlarning 90,9 foizi atigi 10 ta platforma hisobiga to'g'ri keladi va bu o'nlikdagi umumiy xavf miqdori 167,66 milliard dollarni tashkil etgan. Qolgan 89 ta birja esa 20,09 milliard dollarlik xavfli ko'rsatkichga ega bo'lgan.

Tadqiqot mualliflari aniqlangan xavf darajasi birjalar yoki ularning mijozlari noqonuniy faoliyatda ataylab qatnashganini isbotlamasligini, balki shubhali subyektlarga yaqinlikni anglatishini alohida ta'kidladilar. 2025 yilga kelib sanksiyalar xavfli oqimlarning eng asosiy manbaiga aylanib, barcha xavfli kirimlarning 62,2 foizini va chiqimlarning 53.8 foizini tashkil qilgan.

Valyutalar kesimida Tron tarmog'idagi USDT 2025 yildagi shubhali kirimlarning 68 foizini, chiqimlarning esa 80,4 foizini egallagan. Shu bilan birga, Bitcoinning xavfli depozitlardagi ulushi 11 foizgacha pasaygan. Yillik xavfli mablag'lar hajmi 2021 yildagi 60,80 milliard dollardan 2023 yilda 23,85 milliard dollargacha kamayib, 2025 yilda yana 34,61 milliard dollargacha tiklangan.