Pump.fun tokenlari muvaffaqiyati juda past 📉

Solana tarmogʻida ishlaydigan pump.fun memecoin yaratish vositasi orqali chiqarilgan deyarli barcha kriptovalyutalar sezilarli yutuqlarga erisha olmayapti. Bu haqda Dune Analytics tahliliy maʼlumotlari dalolat bermoqda.

Taqdim etilgan raqamlarga koʻra, yaratilgan tokenlarning atigi 1,41 foizigina Solana asosidagi Raydium dezentrallashgan moliya protokoliga qadar yetib bora oladi. May oyidan buyon bu koʻrsatkich 1,21 va 1,41 foiz oraligʻida oʻzgarib turibdi, eng yuqori natija esa 16-fevralda 2,56 foizni tashkil etgan edi. Cinneamhain Ventures hamkori Adam Cochran x ijtimoiy tarmogʻida bu koʻrsatkich 1,4 foiz atrofida turgʻunligini qayd etib, birorta ham yangi tanga 20 million dollarlik toʻliq suyultirilgan baholash (FDV) darajasiga yetmaganini qoʻshimcha qildi.

Boshqa ekspertlar esa bu past koʻrsatkich butun memecoin bozorini ifodalamasligini, aksincha pump.fun platformasi tanga chiqarishni oʻta osonlashtirganini koʻrsatishini taʼkidlaydilar. Pseudonim ostidagi Bunjil ismli sharhlovchining fikricha, platforma bozorni buzmagan, faqatgina jarayonni ochiqroq qilgan xolos.

Muvaffaqiyatli tangalar soni oz boʻlishiga qaramay, platformaning komissiya tushumlari sezilarli darajada yuqori. Pump.fun maʼlum bir bozor kapitallashuviga yetgunga qadar 1% miqdorida tranzaksiya yigʻimi oladi. Masalan, 29-iyul kuni platforma bir kun ichida taxminan 864 000 dollar daromad yigʻib, oʻsha davrdagi Ethereum koʻrsatkichidan 57 foizga oʻzib ketgan edi.

Shuningdek, ushbu vosita mashhur shaxslar orasida ham ommalashgan boʻlib, AQShdan Keytlin Jenner, Iggy Azalea va Jeyson Derulo kabi taniqli insonlar may oyidan beri oʻz qiyofasidagi tokenlarni yaratib kelmoqda. Ayni paytda CoinMarketCap maʼlumotlariga koʻra, memecoin bozorining umumiy kapitallashuvi 44,94 milliard dollarni tashkil etmoqda.