🇩🇪 Intel'ning Germaniyadagi zavodi kechikmoqda

Germaniyaning Volksstimme nashri ma'lum qilishicha, Magdeburg shahrida kelgusida ikkita chip ishlab chiqarish korxonasini o'z ichiga olishi kerak bo'lgan Intel qurilish maydonchasidagi ishlar rejalashtirilgan muddatda boshlanmagan. Ushbu kechikishga bir qancha sabablar ta'sir ko'rsatgan bo'lib, ulardan biri ekologik masalalar bilan bog'liq. Xususan, zavod qurilishi mo'ljallangan hududda unumdor qora tuproq mavjud bo'lib, dastlab uning qalinligi ko'pi bilan 40 santimetrni tashkil qiladi deb baholangan edi. Biroq batafsil tadqiqotlar shuni ko'rsatdiki, ushbu qatlam ba'zi joylarda 90 santimetrgacha yetadi. Qishloq xo'jaligida foyda keltirishi uchun bu unumdor tuproqni boshqa joyga xavfsiz tarzda ko'chirib o'tkazish talab etiladi.

Dastlabki hisob-kitoblarga ko'ra, tuproqni tayyorlash va tashish jarayoni 80 000 ta samosval yukiga teng transport hajmini talab qiladi. Qurilish texnologiyasi talablariga ko'ra gruntni baribir qazib olishga to'g'ri keladi. Qora tuproqni olib chiqib ketish ishlari alohida shartnoma asosida tartibga solinadi va barcha zarur kelishuvlar o'tkazilgach, mazkur ishlar bir yildan keyin boshlanishi rejalashtirilmoqda. Shu vaqt ichida samosvallarning kelajakdagi qurilish maydonchasiga borishini tezlashtiradigan yangi yo'l uchastkasi ham qurib bitkaziladi.

Bundan tashqari, Intel hali ham Yevrokomissiya tomonidan subsidiyalar ma'qullanishini kutmoqda. Kompaniya qurilish uchun umumiy budjetni 30 milliard yevro etib baholamoqda va shundan taxminan 10 milliard yevrosini subsidiyalar hisobidan qoplashni reja qilgan, biroq korporatsiya bundan ham ko'proq yordam olishni istamoqda. Ayni paytda Intel'ning yetkazib beruvchilari va pudratchilari ushbu loyihaga katta qiziqish bildirishmoqda. Kelgusidagi korxonalar atrofida tegishli obyektlar uchun taxminan 450 gektar yerni ajratish rejalashtirilgan bo'lib, bu hududda yer uchastkalarining qiymati yetarlicha yuqori va gektari uchun 250 000 yevrogacha yetadi, vaholanki jozibador qishloq tumanlarida bu ko'rsatkich 40 000 yevrodan oshmaydi.