Krasnodar o'lkasida quyosh stansiyalari quriladi ☀️

Krasnodar o'lkasida uchta yangi quyosh elektr stansiyasini qurish rejalashtirilmoqda. Ushbu hudud Rossiyada quyosh energetikasi bo'yicha yetakchilardan biri hisoblanadi.

Aslida, ekvatordan uzoq bo'lgan mintaqalarda qish mavsumi, qisqa yorug'lik vaqti hamda bulutli kunlar sababli quyosh stansiyalaridan foydalanish samaradorligi past hisoblanadi. Shunga qaramay, turli mamlakatlar, jumladan Rossiya hududlari ma'muriyatlari bunday loyihalarni amalga oshirishni yoqtiradi.

Yangi stansiyalarni qurishdan ko'zlangan asosiy maqsad – yozda hududga keladigan yirik sayyohlar oqimi va issiq havo tufayli elektr tarmoqlariga tushadigan ortiqcha yuklamani kamaytirish va iste'mol cho'qqisini tekislashdir.

Biroq, bu muammoni hal qilish uchun kremniy panellarini o'rnatish maqsadida katta yer maydonlarini band qilish tanqidga uchramoqda. Mutaxassislarning fikricha, Rossiyada iliq iqlimli hududlar unchalik ko'p emas va bunday hududlarni qishloq xo'jaligi yoki boshqa foydali maqsadlar o'rniga quyosh panellari uchun sarflash isrofgarchilikdir. Agar quyosh energetikasi bilan shug'ullanish zarur bo'lsa, bunday panellarni binolarning tom qismiga o'rnatish maqsadga muvofiqroq bo'lar edi.