Izpshichda fojia: 2 yashar qizaloq o'ldirildi 🚨

Buyuk Britaniyaning Ipsvich shahrida sodir bo'lgan mudhish fojia yuzasidan sud jarayoni boshlandi. Prokuror Sally Howes KC Ipswich Crown Court sudida ikki yashar Isabella ismli qizaloq shafqatsiz va ayovsiz zo'ravonliklar qurboni bo'lganini ma'lum qildi. Qizaloqning jasadi o'tgan yilning 30-iyun kuni shahar kengashiga qarashli vaqtincha yashash joyidagi dushxonada bolalar aravachasida yashiringan holda topilgan.

Tergov ma'lumotlariga ko'ra, politsiyaga ayol kishi qo'ng'iroq qilib, Facebook Messenger orqali do'stidan xabar olganini ma'lum qilgan. Ushbu xabarda qizaloq uch kun oldin vafot etgani va uning jasadi aravachada ekani aytilgan edi. Huquq-tartibot idoralari xodimlari ko'rsatilgan manzilga borib, bolaning jasadini aniqlashgan.

Sudga qizaloqning onasi, 24 yoshli sobiq bog'cha xodimi Chelsea Gleason-Mitchell va uning 24 yoshli yigiti Scott Jeff olib kelingan. Har ikki sudlanuvchi o'tgan yilning 26-30-iyun kunlari sodir etilgan qotillik ayblovini rad etmoqda. Shuningdek, Scott Jeff bolaning o'limiga sabab bo'lish va bolalarga nisbatan shafqatsizlik qilish ayblovlarini ham inkor qilmoqda. Onasi esa bola o'limiga sabab bo'lish va bolalar shafqatsizligi ayblovlarini tan olgan.

Tibbiy ekspertiza xulosasiga ko'ra, Isabellaning tanasida bosh, bo'yin, tana va qo'l-oyoqlarda ko'plab og'ir tashqi jarohatlar aniqlangan. Shuningdek, uning har ikki bilagi singani va tos suyagida murakkab sindirish holatlari qayd etilgan. Mutaxassislar jarohatlar tepish yoki oyoq bilan bosish oqibatida kelib chiqqan bo'lishi mumkinligini ta'kidlashdi. Qizaloqning o'limiga skelet travmasidan kelib chiqqan suyak iligi emboliyasi sabab bo'lgani aytilmoqda.

Prokurorning ta'kidlashicha, qizaloq Scott Jeff onaning hayotiga kirib kelguniga qadar sog'lom va parvarish qilingan bola bo'lgan. Biroq, may oyi oxiridan boshlab qizaloqqa nisbatan shafqatsiz zo'ravonliklar rejimi qo'llana boshlagan. Shuningdek, marhum qizaloqning organizmidan kokain moddasi topilgani ham aniqlangan.