🇨🇦 Kanadada kriptovalyuta uchun odam o‘g‘irlangan

Torontoda kriptovalyutani qo‘lga kiritish maqsadida sodir etilgan odam o‘g‘irlash jinoyati yuzasidan yetti nafar shaxs qo‘lga olindi. Hibsga olinganlar orasida Kanada Qurolli Kuchlarining uch nafar xodimi ham bor. Huquq-tartibot idoralari xodimlari mazkur guruhga qarshi jami 82 ta jinoiy ayblov ilgari surganini ma'lum qildi.

Tergov ma'lumotlariga ko‘ra, voqea iyul oyining oxirlarida sodir bo‘lgan. Jinoyatchilar jabrlanuvchini o‘z mashinasi yaqinida poylab turib, unga hujum qilishgan va qo‘llarini kishanlab olib qochishgan. O‘g‘irlab ketilgan shaxs kaltaklanib, undan kriptovalyuta jamg‘armalari hamda biznesiga tegishli xavfsizlik tizimlariga kirish talab etilgan. Jabrlanuvchi ma'lum muddatdan so‘ng politsiyaga murojaat qilmaslik sharti bilan qo‘yib yuborilgan.

Politsiya bir sutka ichida jinoyatda ishlatilgan avtomashinani aniqlab, dastlab ikki gumonlanuvchini qo‘lga olgan. Keyingi tezkor-qidiruv tadbirlari va tintuvlar davomida armiyaga tegishli bo‘lgan taxminan 2,500 dona o‘q-dori, o‘qotar qurollar, 3D printerda yasalgan qismlarga ega qurollar, taqiqlangan moddalar, GPS kuzatuv moslamalari, shuningdek, kokain va metamfetamin kabi giyohvand moddalar musodara qilingan.

Hibsga olingan harbiylarning shaxsi Talarambage Fernando, Jeyms Moro va Jek Mayli ekani ochiqlandi. Tergovchilar ularning qolgan to‘rt nafar gumonlanuvchi bilan aloqalarini o‘rganmoqda, biroq hozircha uyushgan jinoiy guruhga aloqadorlik alomatlari aniqlanmagan. Ayblanuvchilarga nisbatan garov evaziga odam o‘g‘irlash, qonuniy bo‘lmagan qurol saqlash va giyohvand moddalar savdosi kabi moddalar bo‘yicha ayblovlar qo‘yilgan.

Mazkur voqeadan so‘ng Kanada Mudofaa vazirligi ham ichki harbiy tergov boshlab, harbiy qismlardagi o‘q-dorilar hisobini qattiq nazoratdan o‘tkazishga kirishdi. Hozircha huquqni muhofaza qiluvchi idoralar jabrlanuvchidan qancha miqdordagi raqamli aktivlar talab qilingani yoki mablag‘lar o‘tkazib berilgani haqida aniq ma'lumot bermagan.