📉 Bitcoin 80 000 dollardan tushdi

AQSh Mehnat vazirligi e'lon qilgan so'nggi ma'lumotlarga ko'ra, sentabr oyida mamlakatda ishlab chiqaruvchilar narxlari indeksi tahlilchilar prognozlaridan sezilarli darajada yuqori bo'lgan. Xususan, yillik PPI inflyatsiyasi 5,3 foizlik kutilmani ortda qoldirib, 6,3 foizga yetdi. Asosiy ko'rsatkich esa 4,4 foizlik prognoz o'rniga 5 foizni tashkil etdi. Natijada erkin bozorlardagi ishlab chiqaruvchilar inflyatsiyasi 2022-yilning noyabridan beri kuzatilmagan eng yuqori nuqtaga ko'tarildi.

Ushbu salbiy makroiqtisodiy ko'rsatkichlar raqamli aktivlar bozorida yangi yo'qotishlarni keltirib chiqardi. Xususan, asosiy kriptovalyuta bo'lgan Bitcoin qiymati qisqa muddatga 80 000 AQSh dollaridan pastga tushib ketdi. Shundan so'ng bozor ishtirokchilari qisman tiklanishga erishib, narxni 81 100 dollar atrofiga qaytarishdi. Shunga qaramay, inflyatsiyaning davom etishi investorlarni xavotirga solmoqda.

Inflyatsiyaning yuqori darajada saqlanib qolishiga asosiy sabablardan biri sifatida energiya resurslari qimmatlashgani ko'rsatilmoqda. Bir necha oydan buyon davom etayotgan Eron urushi global neft ta'minotiga salbiy ta'sir ko'rsatib, transport xarajatlarini oshirib yubordi. Xususan, Brent markali neftning bir barreli narxi 105 dollar atrofida baholanmoqda.

Qimmatbaho metallar va xom ashyo bozoridagi tebranishlar fonida boshqa yirik altkoinlar ham bosim ostida qoldi. Ethereum kursi 2 350 dollarga tushgan bo'lsa, XRP 1,31 dollar va Solana 103 dollar atrofida savdo qilinmoqda. Ilk shokdan so'ng narxlar qisman barqarorlashgan bo'lsa-da, AQShda inflyatsiyaning keyingi taqdiri borasidagi noaniqlik saqlanib turibdi.

Eъlon qilingan yangi ma'lumotlar AQSh Markaziy banki tomonidan foiz stavkalarining oshish ehtimolini biroz ko'tardi. CME FedWatch ma'lumotlariga ko'ra, oktabr oyi oxirida foiz stavkasini oshirish ehtimoli 27,1 foizni tashkil etgan. Biroq, hozircha foiz stavkalarini o'zgarishsiz qoldirish ehtimoli yuqoriroq baholanmoqda. Agar iste'mol va ishlab chiqaruvchi narxlari yuqoriligicha qolsa, Federal zaxira tizimi o'z pul-kredit siyosatini yanada qat'iylashtirishi mumkin.

Shuningdek, Amerika davlat obligatsiyalari bo'yicha yuqori stavkalar ham kriptovalyuta bozoriga o'z ta'sirini o'tkazmoqda. Hozirda o'n yillik qog'ozlar rentabelligi 5,064 foizni, yigirma yilliklar esa 5,44 foiz atrofida daromad keltirmoqda. Natijada davlat obligatsiyalari past xavf evaziga jozibador daromad taqdim etmoqda va bu Bitcoin kabi yuqori xavfli aktivlarga yangi kapital oqimini qiyinlashtirmoqda.