Yangi Google Nest termostat 🌡️

Google kompaniyasi deyarli o'n yil davomida o'zgarishsiz qolib kelgan mashhur Nest Learning Thermostat qurilmasining uchinchi avlodidan keyingi yangi versiyasini rasman e'lon qildi. Google TV Streamer taqdimoti bilan bir vaqtda namoyish etilgan to'rtinchi avlod Nest Learning Thermostat mutlaqo yangi dizaynga ega bo'lib, uning korpusi qora, kumush va oltin ranglarda ishlab chiqariladi. Biroq, qavariq shakldagi yangi LCD displey avvalgi avlodlarga nisbatan 60 foizga kattalashgani sababli bu ranglar ekran ostida deyarli ko'rinmay qolgan.

Tashqi ko'rinishidagi o'zgarishlarga qaramay, qurilma menyular bo'ylab harakatlanish va kerakli haroratni qo'lda belgilash imkonini beruvchi an'anaviy aylanma ramkani o'zida saqlab qolgan. Shuningdek, yangi modelga Soli radar tizimiga tayanuvchi 'Dynamic Farsight' funksiyasi integratsiya qilindi. Ushbu texnologiya foydalanuvchi qurilmaga yaqinlashganda ekranda turli ma'lumotlarni namoyish etishga xizmat qiladi.

O'z nomiga mos ravishda, ushbu termostat egasining odatlarini o'rganib boradi va energiya tejamkorligini ta'minlash hamda xonada eng qulay haroratni saqlash uchun avtomatik ravishda sozlanadi. Qo'shimcha ravishda, qurilma nafaqat Google Home, balki o'rnatilgan Matter modemi tufayli Apple HomeKit va Samsung SmartThings aqlli uy tizimlari bilan ham muvaffaqiyatli ishlay oladi.

Hozircha to'rtinchi avlod Nest Learning Thermostat faqat Kanada va AQSh bozorlari uchun mo'ljallangan bo'lib, boshqa mamlakatlarda sotuvga chiqish muddati va narxlari haqida hozircha ma'lumot berilmagan. AQShda ushbu yangi gadjet 279,99 AQSh dollari, Kanadada эsa 379,99 Kanada dollari narxida baholangan va uning yetkazib berish ishlari 20-avgust sanasidan boshlanishi rejalashtirilgan. Shuni ta'kidlash kerakki, har bir to'plamga bitta ikkinchi avlod Nest Temperature Sensor datchigi qo'shib beriladi, qo'shimcha datchiklarni esa alohida 39,99 dollarga yoki uchta dona to'plam ko'rinishida 99,99 dollarga sotib olish mumkin.