AQSh va Malayziya yarimo'tkazgichlar bo'yicha kelishadi 🤝

Malayziya Tayvan kabi asosiy global yarimo'tkazgichlar markazi bo'lmasa-da, jahon yarimo'tkazgichlar bozori aylanmasining o'ndan ziyod qismi aynan shu mamlakat hissasiga to'g'ri keladi. Hududda nafaqat ko'plab soha kompaniyalarining mikroprotsessorlarni sinovdan o'tkazish va qadoqlash korxonalari joylashgan, balki tovar ayirboshlashda faol qatnashadigan rivojlangan logistika infratuzilmasi ham mavjud.

Reuters agentligi ma'lumotlariga ko'ra, AQSh savdo vaziri Jina Raymondoning Malayziyaga tashrifi chog'ida mahalliy hamkasbi bilan kelasi yilning boshida yarimo'tkazgichlar komponentlarini yetkazib berish sohasidagi hamkorlik to'g'risidagi bitimni imzolash bo'yicha kelishuvga erishildi.

Malayziya sanoati vakillari avvalroq butlovchi qismlar taqchilligi yana bir necha yilga cho'zilib ketishidan xavotir bildirishgan edi. Biroq Amerika rasmiylari bu qadar uzoq kutish niyatida emas va shuning uchun ma'muriy chora-tadbirlar orqali chiplar yetkazib berish jarayonini normallashtirishni tezlashtirishga harakat qilmoqda.

Xususan, rasmiylar yarimo'tkazgichlar komponentlari yetkazib berish jarayonida nima sodir bo'layotganini yaxshiroq tushunish imkonini beruvchi ko'proq ma'lumot olishni maqsad qilgan. Ushbu qadamlar global ta'minot zanjiridagi uzilishlarni kamaytirishga xizmat qilishi kutilmoqda.