🇺🇸 AQSh armiyasi xatlari Maliyga ketmoqda!

Financial Times nashri eʼlon qilgan so‘nggi hisobotga ko‘ra, AQSh Qurolli kuchlari o‘n yildan ortiq vaqt davomida jiddiy va hayratlanarli xatoga yo‘l qo‘yib kelgan. Aniqlanishicha, armiyaga tegishli millionlab elektron xatlar adashib G‘arbiy Afrikaning Mali davlatiga yo‘naltirilgan. Ushbu holatga oddiy imlo xatosi sabab bo‘lib, xodimlar manzil yozishda AQSh armiyasining .mil domen kengaytmasi o‘rniga tasodifan Maliqqa tegishli .ml domenini kiritib kelishgan.

Mazkur xatolik oqibatida ko‘plab maxfiy ma'lumotlar xorijiy davlatga sizib chiqqan. Mali domenini boshqaruvchi gollandiyalik mutaxassis Yoxannes Zuurbier bu muammo yuzasidan AQSh hukumatini bir necha bor ogohlantirganini ma'lum qilgan. U xatolarni ushlash uchun maxsus tizim o‘rnatgan bo‘lib, faqat yanvar oyining o‘zida 117 mingdan ortiq xat noto‘g‘ri manzilga borganini aniqlagan.

Adashib yuborilgan xatlar orasida harbiy xizmatchilarning shaxsiy ma'lumotlari, tibbiy yozuvlar, soliq hujjatlari, bazalar xodimlari ro‘yxati va suratlari mavjud bo‘lgan. Jumladan, AQSh Birlashgan shtab boshliqlari qo‘mitasi raisi Jeyms McConville'ning Indoneziyaga safar jadvali tafsilotlari ham ushbu xatlar sirasida bo‘lgani aytilmoqda.

Mutaxassisning o‘n yillik shartnomasi yakunlangani sababli u endi bunday xatlarni ushlab qola olmaydi. AQSh Mudofaa vazirligi vakili Tim Gorman vaziyatdan xabardor ekanliklarini, muammo jiddiy nazoratga olingani va yuboruvchilar manzillarni tekshirish bo‘yicha ogohlantirilganini ta'kidladi.