Tether va Bo Hines mojarosi: 6.3 mln dollar 💵

Tether kompaniyasi sobiq Oq uy kriptovalyuta maslahatchisi Bo Xayns bilan bogʻliq konsalting firmasiga jami 6,3 million dollar miqdorida mablagʻ oʻtkazgani maʼlum boʻldi. Bu haqda The Wall Street Journal nashri oʻtkazgan maxsus surishtiruvda batafsil bayon etilgan.

Maʼlum boʻlishicha, ushbu moliyaviy kelishuv Bo Xayns oʻz otasi va yana bir sherigi bilan birgalikda asos solgan Nxum konsalting firmasiga aloqador. Xayns 2025-yil yanvaridan avgustigacha Oq uyning raqamli aktivlar boʻyicha ijrochi direktori lavozimida faoliyat yuritgan va shu davrda Nxum kompaniyasidagi uchdan bir qism ulushini saqlab qolgan. U hukumatda ishlagan vaqtida USDT emitenti hisoblangan Tether kompaniyasiga ham taalluqli boʻlgan federal barqaror tanga qoidalarini belolovchi GENIUS qonun loyihasi ustida ishlagan.

Nashrning ichki hujjatlar, Signal messenjeri xabarlari va blokcheyn yozuvlariga tayanib xabar berishicha, tomonlar oʻrtasidagi tijoriy aloqalar 2025-yil aprel oyida boshlangan. Oshkora boʻlmagan muzokaralar natijasida Tether va konsalting firmasi oʻrtasida oylik 415 ming dollarlik shartnoma imzolangan. Birinchi yirik tranzaksiya 2025-yilning 11-mayida amalga oshirilib, Bitfinex birjasi orqali 2,49 million dollar oʻtkazib berilgan.

Nxum vakillari Bo Xayns davlat xizmatida boʻlgan davrda kompaniyaning Tether bilan olib borgan muzokaralarida ishtirok etmaganini qat'iy ta'kidlagan. Ularning soʻzlariga koʻra, Xayns tezkor faoliyatdan chetlatilgan va Oq uyda ishlagan paytida Tether'dan kelgan pullardan ulush olmagan.

Xayns 2025-yil avgust oyida Oq uydagi lavozimini tark etgan va koʻp oʻtmay Tether kompaniyasiga qoʻshilib, uning AQShdagi barqaror tanga operatsiyalariga rahbarlik qila boshlagan. Keyingi oʻtkazmalar esa 2025-yil dekabri va 2026-yil aprel oylarida amalga oshirilgan.