Sony PlayStation Portal OLED talqini chiqishi mumkin 🎮

Sony kompaniyasi o'zining PlayStation Portal portativ quridasining yangilangan versiyasini chiqarishga tayyorgarlik ko'rayotgan bo'lishi mumkin. Yaqinda Wi-Fi Alliance sertifikatsiyalash idorasi yozuvlarida ilgari e'lon qilinmagan ikkita yangi PlayStation qurilmasi qayd etildi. Ushbu topilma tarmoqda o'yinlarni uzatishga mo'ljallangan gadjetning yangi talqini, jumladan OLED displey bilan jihozlangan modeli ustida ish olib borilayotgani haqidagi taxminlarni yanada kuchaytirdi.

OLED ekranli PlayStation Portal haqidagi mish-mishlar joriy yilning boshidayoq paydo bo'lgan edi. Oshkor bo'lgan ma'lumotlarga ko'ra, yapon kompaniyasi qurilmaning asosiy vazifalarini o'zgartirmagan holda uning ekran texnologiyasini yaxshilashni rejalashtirayotgan bo'lishi mumkin. Sertifikatsiya bazasida ikki ta noma'lum mahsulotning paydo bo'lishi ushbu gap-so'zlarga asos berdi, biroq rasmiy hujjatlar mazkur qurilmalardan biri aynan yangi Portal ekanini to'g'ridan-to'g'ri tasdiqlamaydi.

Odatda, simsiz aloqa moslamalari savdoga chiqarilishidan oldin Wi-Fi Alliance sertifikatidan o'tishi talab etiladi. Shuning uchun bunday ro'yxatga olish jarayonlari yangi apparat taqdimoti yaqinlashayotganidan darak berishi mumkin. Shunga qaramay, sertifikat hujjatlarida gadjetning dizayni, texnik tavsiflari yoki qaysi bozorga mo'ljallangani haqida deyarli ma'lumot berilmaydi, bu esa kompaniyaning kelgusidagi rejalari borasida ko'plab savollarni qoldiradi.

Eslatib o'tamiz, hozirgi PlayStation Portal 8 dyuymli LCD displey bilan jihozlangan bo'lib, u foydalanuvchilarga o'z o'yinlarini PS5 konsolidan Wi-Fi tarmog'i orqali strim qilish imkonini berish uchun yaratilgan edi. Agar OLED ekran qo'shilsa, bu kontrastni yaxshilashi, qora ranglarni chuqurroq ko'rsatishi va ranglarni yorqinroq qilishini ta'minlaydi. Hozircha Sony kompaniyasi mazkur sertifikatlangan mahsulotlarni rasman tan olgani yo'q va yangi qurilmalar bo'yicha aniq rejalarini e'lon qilgani yo'q.