Kelgusi iPad Pro 4 TB xotiraga ega bo‘lishi mumkin 💾

Apple kompaniyasi o‘zining mashhur planshetlari bozorini rivojlantirishda davom etmoqda. Garchi yillar davomida iPad Pro shaxsiy kompyuter o‘rnini bosishi ta’kidlanib, so‘nggi MacBook'lar bilan bir xil protsessor bilan ta’minlangan bo‘lsa-da, u baribir planshetligicha qolmoqda. Biroq texnologiya giganti bu boradagi harakatlarni to‘xtatgani yo‘q.

PhoneArena nashri tarqatgan ma'lumotlarga ko‘ra, Apple kelgusida o‘z qurilmalarida ichki xotira hajmini keskin oshirish yo‘lini ko‘rib chiqmoqda. Gap foydalanuvchilarga naqd 4 terabaytgacha xotira taqdim etishi mumkin bo‘lgan yangi modifikatsiya haqida bormoqda. Albatta, bu juda tor doiradagi xaridorlarga mo‘ljallangan bo‘lishi aniq, chunki hozirgi kunda taklif etilayotgan 2 TB sig‘imli versiyaning o‘zi ham eng ko‘p sotiladigan mahsulotlar qatoriga kirmaydi.

Shunga qaramay, agar qurilmadan muayyan kasbiy sohalardagi mutaxassislarni qo‘llab-quvvatlash vositasi sifatida foydalanish ko‘zda tutilsa, bu qadamni ma'lum ma'noda mantiqli deb atash mumkin. Kompaniya o‘z planshetini professional foydalanuvchilar uchun yanada qulaylashtirishga intilmoqda.

So‘nggi mish-mishlarga ko‘ra, 2023-yilgi iPad Pro modeli Microsoft Surface qurilmalariga o‘xshab ketishi kutilmoqda. Xususan, Apple kattaroq trekpadga ega yangi Magic Keyboard klaviaturasini chiqarishni rejalashtirgan. Ushbu o‘zgarishlar natijasida iPad Pro aslida o‘zi raqobat qilishi kerak bo‘lgan noutbuklarga yanada yaqinlashib, o‘ziga xos kompyuterga aylanishi mumkin.