iOS 26 yangilanishi qachon chiqadi? 📱

Apple kompaniyasining navbatdagi yirik operatsion tizimi sanalgan iOS 26 ning chiqarilish sanasi boʻyicha dastlabki ma'lumotlar ma'lum boʻldi. Oxirgi uchta yirik iOS versiyasining taqdimot grafigiga e'tibor qaratilsa, Apple bu borada ma'lum bir an'anaga amal qilishini koʻrish mumkin. Xususan, kompaniya iOS 18 ni 16-sentyabrda, iOS 17 ni 18-sentyabrda, iOS 16 ni esa 12-sentyabrda chiqarib kelgan. Mazkur sanalar doimo yangi iPhone smartfonlari tanishtirilganidan keyingi bir haftalik muddatga toʻgʻri kelgan. Garchi bu yil kompaniya nomlash borasida qandaydir oʻzgarishlar qilishi kutilayotgan boʻlsa-da, dasturiy ta'minotning taqdim etilish vaqtida sezilarli oʻzgarishlar boʻlishi kutilmayapti. Shunga koʻra, iOS 26 operatsion tizimi ham iPhone 17 taqdimotidan soʻng, aynan sentyabr oyining oʻrtalarida foydalanuvchilarga yetkazilishi taxmin qilinmoqda.

Asosiy relizdan oldin, har yilgidek, Apple iOS 26 ning ommaviy beta-versiyasini chiqaradi. Ushbu test versiyasi iyul oyida e'lon qilinishi kutilmoqda. Unda qatnashishni istagan har bir foydalanuvchi rasmiy veb-sayt orqali roʻyxatdan oʻtish imkoniyatiga ega boʻladi.

Shu bilan birga, mutaxassislar va dastlabki sinovchilarning fikricha, har qanday dastlabki beta-versiya kabi iOS 26 ham turli xatolar va ishlash jarayonidagi muammolarga boy boʻlishi mumkin. Dastlabki sinov jarayonida qatnashgan foydalanuvchilar tizimda sezilarli qotishlar, yangi dizayn elementlarida ayrim vizual nuqsonlar borligini bildirishgan. Batareya quvvati masalasida esa fikrlar turlicha boʻlib, ayrimlar quvvat tez tugayotganini aytsa, boshqalar bu koʻrsatkich avvalgi versiyalar bilan bir xil darajada qolayotganini ta'kidlamoqda.