Apple Watch Series 12 sinovdan o'ta olmadi ⌚

Apple kompaniyasining so'nggi rusumdagi Apple Watch Series 12 hamda Apple Watch Ultra 4 aqlli soatlari iFixit mutaxassislari tomonidan sinovdan o'tkazildi va tuzilish hamda ta'mirlash qulayligi bo'yicha baholandi. Har ikki yangi gadjet ham o'tkazilgan tekshiruvlar natijasida 10 baldan atigi 4 bal olib, ta'mirlash imkoniyati past ekanini ko'rsatdi.

Apple Watch Series 12 modelida ta'mirlashni osonlashtirish yo'lida ayrim kichik qadamlar tashlandi. Xususan, avvalgi qiyin usullar o'rniga batareyani osongina tortib chiqarishga imkon beruvchi yelimli lentalar tizimi qo'shildi. Shuningdek, 46 millimetrli versiyadagi akkumulyator sig'imi avvalgi avlodga nisbatan biroz oshirildi va ekran ulagichi oddiyroq bosib taqiladigan turga o'zgartirildi. Biroq bu o'zgarishlarning ham o'z kamchiliklari bor, chunki endi ekranning o'zini almashtirish uchun ham batareyani majburiy ravishda yangilash talab etiladi.

Qurilma ichiga kirishning yagona yo'li hamon oldingi ekran qismi bo'lib qolmoqda. Series 12 modeli korpusidagi bo'shliqlar juda tor bo'lgani sababli, ekranni ajratib olish vaqtida uni sindirib qo'yish yoki nozik simni shikastlab olish xavfi yuqori. Ultra 4 versiyasida esa tuzilish bo'yicha deyarli o'zgarishlar kuzatilmadi. Uning batareya hajmi kattalashgani va yangi S11 chipidan foydalanilganiga qaramay, ta'mirlash jarayoni avvalgidek murakkabligicha qoldi va soat yana 10 dan 4 ball oldi.

Apple kompaniyasi iPhone, iPad va Mac qurilmalari uchun mustaqil ta'mirlash dasturlarini taklif etsa-da, aqlli soatlar uchun bunday imkoniyat mavjud emas. Shu sababli foydalanuvchilar har qanday nosozlikda faqat rasmiy servis markazlariga murojaat qilishga majbur. AQShda GPS va Cellular funksiyali Series 12 batareyasini almashtirish narxi 99 dollar atrofida baholanmoqda, boshqa turdagi jiddiy shikastlanishlarni tuzatish esa yangi soatning o'z narxidan ham oshib ketishi mumkin. iFixit mutaxassislari ushbu holat AQShning ayrim shtatlarida qabul qilingan mustaqil ta'mirlash huquqi qonunlariga zid kelishini ta'kidlamoqda.