Plastik kartalar soni cheklanadimi? 💳

O‘zbekistonda fuqarolarga rasmiylashtiriladigan bank kartalari soniga cheklovlar joriy etilishi kutilmoqda. Ushbu tashabbus haqida Markaziy bank raisi o‘rinbosari Behzod Hamroyev ishtirokidagi media-muloqotda ma’lum qilindi. Regulyator vakilining ta’kidlashicha, amaldagi qonunchilikda fuqarolarning bitta pasport orqali ochishi mumkin bo‘lgan kartalar soni rasman cheklanmagan. Oqibatda ayrim mijozlar yuzdan ortiq bank kartasiga egalik qilayotgani kuzatilgan.

Markaziy bank matbuot xizmatining qo‘shimcha qilishicha, mazkur choralar moliyaviy firibgarliklar va shubhali frod operatsiyalarining oldini olishga qaratilgan. Tahlillar ko‘rsatishicha, ko‘plab kartalarning ochilishi keyinchalik jinoyatchilar tomonidan mablag‘larni noqonuniy o‘zlashtirish sxemalarida ishlatilmoqda. Shu bois, bitta shaxsga (bitta JSHSHIRga) tegishli kartalar sonini, jumladan virtual va kobeyjing kartalarni hisobga olgan holda, bitta bankda 5 tacha va barcha banklar miqyosida 20 tagacha cheklash masalasi muhokama qilinmoqda. Shuni alohida ta’kidlash joizki, chet el valyutasida ochilgan bank kartalariga bu talablar tatbiq etilmaydi.

Statistik ma’lumotlarga ko‘ra, joriy yilning 1 noyabr holatiga ko‘ra mamlakatimizda muomaladagi bank kartalari soni 54,9 million taga yetgan. Bugungi kunda kartaga ega bo‘lgan jismoniy shaxslarning 97 foizi (22 million nafar) 5 tagacha, 3 foizi (770 ming nafar) 5 tadan 20 tagacha, atigi 0,03 foizi (7 ming nafari) esa 20 tadan ortiq kartaga ega. Markaziy bank rejalashtirilayotgan yangi tartiblar aholining kundalik to‘lovlarni amalga oshirishida hech qanday noqulaylik tug‘dirmasligiga ishontirmoqda.

Regulyator mazkur yo‘nalishdagi vaziyatni doimiy nazorat ostida saqlab kelmoqda. Mutasaddilarning bildirishicha, bank kartalari bo‘yicha yangi talablar loyihasi to‘liq tayyor bo‘lganidan so‘ng, keng jamoatchilik va OAV vakillari muhokamasiga taqdim etiladi.