⚡️ Tesla kompaniyasining Bitcoin aktivlari 1 mlrd dollarga yaqinlashdi

Dunyoga mashhur tadbirkor Ilon Mask rahbarlik qilayotgan elektromobil ishlab chiqaruvchi Tesla kompaniyasi yirik korporativ Bitcoin egalaridan biri sifatidagi mavqeini saqlab qolmoqda. Bozordagi doimiy tebranishlar ko'plab yirik investorlarni o'z pozitsiyalaridan voz kechishga majbur qilgan bo'lsa-da, Tesla oxirgi to'rt yil davomida o'z kriptovalyuta zaxiralarini o'zgarishsiz saqlab kelmoqda.

Arkham tahliliy kompaniyasining so'nggi ma'lumotlariga ko'ra, joriy yilning 13-oktabr holatiga ko'ra, Tesla balansida naqd 8 430 ta Bitcoin mavjud. Bitkoinning joriy bozor narxidan kelib chiqqan holda, kompaniyaning raqamli aktivlari qariyb 960 million dollarga baholanmoqda. Bir necha oylik bozor beqarorligini boshdan kechirganiga qaramay, 2021-yilda amalga oshirilgan dastlabki xarid narxi ancha past bo'lgani sababli, firma salmoqli foyda ko'rishda davom etmoqda.

Eслатиб ўтамиз, Tesla 2021-yil fevral oyida 1,5 milliard dollarlik Bitcoin xarid qilgani haqida e'lon qilib, butun dunyo e'tiborini tortgan edi. O'shanda kriptovalyuta narxining keskin o'sishi kompaniya aktivlari qiymatini 2 milliard, hatto 2,5 milliard dollargacha yetkazgan edi. Biroq, keyinchalik kompaniya o'z ulushining bir qismini sotib yuborgan, jumladan 2021-yilda 4 670 ta BTC realizatsiya qilingan va 2022-yil may oyidagi LUNA tangasi qulashi paytida ham ayrim harakatlar amalga oshirilgan edi.

Bir nechta savdo operatsiyalaridan so'ng, Tesla kompaniyasining Bitcoin zaxirasi 2022-yildan beri 8 430 ta tanga atrofida barqaror saqlanib kelmoqda. O'sha paytda taxminan 250 million dollarga baholangan ushbu zaxira bugungi kunda 960 million dollarga yetdi. Natijada, o'tgan to'rt yil ichida kompaniya faqat Bitcoin kursining o'zgarishi evaziga 710 million dollardan ortiq foyda ko'rishga muvaffaq bo'ldi.