NASA kelajak samolyotini yaratishni qo'llab-quvvatlaydi ✈️

AQSh kosmik agentligi NASA atrof-muhitga zarari kam bo'lgan kelajakdagi tijorat samolyotlari dizaynini ishlab chiqish ishlarini moliyalashtirishda davom etmoqda. Agentlikning Advanced Aircraft Concepts for Environmental Sustainability (AACES) 2050 tashabbusi doirasida jami 11,5 million dollarlik beshta yangi tadqiqot loyihasiga buyurtma berildi. Ushbu mablag'lar orqali aviatsiya sohasida chiqindilarni keskin kamaytirishga qaratilgan ilg'or g'oyalar o'rganiladi.

Mazkur loyihada dunyoga mashhur tashkilotlar va ixtisoslashgan kompaniyalar qatnashmoqda. Ular orasida Boeing tarkibiga kiruvchi Aurora Flight Sciences, aerokosmik sohadagi Electra, Jorjiya texnologiya instituti, JetZero aviatsiya startapi hamda Pratt & Whitney mavjud. Har bir ishtirokchi o'ziga ajratilgan yo'nalish bo'yicha tadqiqot olib boradi.

Xususan, Aurora Flight Sciences muqobil yoqilg'i turlari, zamonaviy dvigatel tizimlari, aerodinamika va samolyot tuzilishi ustida ishlaydi. Electra jamoasi esa elektr tortish kuchi hamda asosiy korpus va qanotlar dizaynini takomillashtirish orqali shovqin va chiqindilarni qisqartirishga e'tibor qaratadi. Jorjiya texnologiya instituti barqaror rivojlanish texnologiyalarini tadqiq etsa, JetZero kriogen suyuq vodoroddan yoqilg'i sifatida foydalanish imkoniyatlarini o'rganadi.

Pratt & Whitney kompaniyasi esa yoqilg'i sarfi va issiqxona gazlari chiqindilarini kamaytirish uchun aviatsiya dvigatellarining issiqlik samaradorligini oshirish texnologiyalariga e'tibor qaratadi. AACES dasturi doirasida ishlab chiqilgan samolyot dizayni konsepsiyalari kelgusi 25 yil ichida foydalanishga topshirilishi kutilmoqda.

Eslatib o'tamiz, NASA 2021 yilda ham Barqaror parvoz milliy hamkorligini yo'lga qo'ygan edi. Buning natijasida 2023 yilda Boeing bilan hamkorlikda X-66A modeli taqdim etilgan bo'lib, uning yangi texnologiyalari hozirgi zamonaviy havo kemalariga nisbatan yoqilg'i sarfini 30 foizgacha kamaytira oladi.