Samsung ilk HBM4E namunalarini yetkazib bermoqda 🚀

Samsung Electronics ilg'or xotira texnologiyalari bo'yicha global bozor yetakchisi sifatida 12 qatlamli HBM4E namunalarini yirik xalqaro mijozlarga yetkazib berish boshlanganini rasman e'lon qildi. Ushbu qadam kompaniyaning keyingi avlod yuqori o'tkazuvchanlik xotirasi bozoridagi mavqeini yanada mustahkamlashga xizmat qiladi. Joriy yil boshida HBM4 xotirasini sanoatda birinchilardan bo'lib ommaviy ishlab chiqarish va tijorat maqsadida jo'natishni boshlagan Samsung, endilikda sun'iy intellekt va gipermiqiyosli infratuzilmalarning tez o'zgarib borayotgan ehtiyojlarini qondirish uchun HBM4E namunalarini taqdim etmoqda.

Yangi 12 qatlamli HBM4E xotirasi 48 gigabayt hajmga ega bo'lib, bu avvalgi avlodga nisbatan 30 foizdan ortiq ko'p demakdir. Bundan tashqari, kompaniya mijozlarning talablaridan kelib chiqqan holda 32 gigabaytli 8 qatlamli va 64 gigabaytli 16 qatlamli modifikatsiyalarni ham ishlab chiqarishni rejalashtirgan. Ushbu mahsulot Samsung kompaniyasining keng qamrovli yarimo'tkazgich imkoniyatlari hamda HBM4 ishlab chiqarish tajribasi asosida yaratilgani bilan ahamiyatlidir.

Mazkur tizim eng ilg'or oltinchi avlod 10 nanometrli DRAM jarayoni va Samsung Foundry tomonidan tayyorlangan 4 nanometrli mantiqiy asos plitasidan foydalanadi. Bu esa ishlab chiqarish barqarorligini ta'minlashga yordam beradi. Xotira va mantiqiy arxitekturalarni loyihalash hamda optimallashtirish ishlari samaradorlik, quvvat tejamkorligi va foydali chiqish ko'rsatkichlarini sezilarli darajada oshirdi.

Jumladan, ilg'or quvvati past dizayn texnologiyalari va optimallashtirilgan qadoqlash tuzilmalari energiya samaradorligini 16 foizga, issiqlikka chidamlilik xususiyatlarini эsa 14 foizdan ko'proqqa yaxshiladi. Bunday o'zgarishlar issiqlikni samarali tarqatishga sharoit yaratib, ma'lumotlar markazlarida yuqori yuklamalar ostida ham ishonchlilikni uzaytiradi va energiya sarfini kamaytiradi. Samsung mijozlar bilan kelishilgan holda namunalarni sinovdan o'tkazgach, HBM4E xotirasini ommaviy ishlab chiqarishni boshlashni rejalashtirmoqda.