Apple Watch Series 12 sinovdan o'ta olmadi ⌚

Apple kompaniyasining yangi taqdim etilgan aqlli soatlari Apple Watch Series 12 hamda Apple Watch Ultra 4 iFixit mutaxassislari tomonidan maxsus sinovdan o'tkazildi. O'tkazilgan tekshiruv natijalariga ko'ra, har ikki qurilma ham ta'mirlash qulayligi bo'yicha past natija ko'rsatib, 10 baldan atigi 4 ball oldi. Mutaxassislar ushbu aqlli soatlarni mustaqil ravishda tuzatish hamon juda qiyin ekanini ta'kidlashmoqda.

Apple Watch Series 12 modelida ta'mirlash borasida ayrim kichik ijobiy o'zgarishlar kuzatildi. Xususan, asosiy yangilik batareya qismida amalga oshirilgan bo'lib, avvalgi modellardagi qiyin usullar o'rniga tortib chiqariladigan maxsus yelim bant joriy etildi. Shuningdek, 46 mm o'lchamdagi Series 12 batareya quvvati avvalgi avlodga nisbatan oshdi va ekran ulanishidagi eski ZIF konnektori bos-tak turidagi yangi yechimga almashtirildi. Biroq ushbu o'zgarishlarning o'ziga yarasha kamchiliklari ham mavjud bo'lib, endilikda faqat ekranning o'zini almashtirish uchun ham batareyani majburiy ravishda yangilash talab etiladi.

Qurilma ichiga kirishning yagona yo'li hamon oldingi ekran qismi bo'lib qolmoqda. Series 12 modelida bo'shliqlar yanada toraygani sababli, ekranni ajratib olish vaqtida paneli sindirib qo'yish yoki uning nozik kabelini uzib yuborish xavfi yuqoriligicha qolmoqda. O'z navbatida, Apple Watch Ultra 4 modelida ta'mirlash imkoniyatlari deyarli o'zgarmagan. Orqa qismdagi pentalob vintlar faqat sensor moduliga ruxsat berib, suv o'tkazmaslik xususiyatini xavf ostiga qo'yadi. Ultra 4 batareyasi ham kattalashgan bo'lsa-da, soat avvalgi uchta avlod kabi 10 baldan 4 ball olish bilan kifoyalandi.

Apple kompaniyasi iPhone, iPad va Mac qurilmalari uchun mustaqil ta'mirlash dasturlarini taklif etsa-da, Apple Watch uchun bunday imkoniyat mavjud emas. Soatni ta'mirlashning yagona manzili bu Apple rasmiy servis markazi hisoblanadi. Masalan, AQShda GPS va uyali aloqa moduliga ega Series 12 batareyasini almashtirish 99 dollar atrofida baholanayotgan bo'lsa, boshqa turdagi shikastlanishlarni tuzatish narxi 599 dollarni tashkil etadi. Bu esa yangi aluminiy korpusli soatning o'z narxidan ham qimmatroqdir.