Snapdragon X Elite o‘yinlarda sinab ko‘rildi 🎮

Yaqinda Qualcomm kompaniyasi ARM arxitekturasi asosida ishlaydigan yangi Snapdragon X Elite protsessorlari Windows uchun yaratilgan o‘yinlarni hech qanday muammosiz ishga tushirishga qodir ekanligini e'lon qilgan edi. Shundan so‘ng internetda ushbu chipning real imkoniyatlari haqida ilk video va sharhlar paydo bo‘lib, ko‘plab blogerlarda ijobiy taassurot qoldirdi.

O‘yinlar ishlab chiquvchilarining Games Developer Conference 2024 ko‘rgazmasida Snapdragon X Elite bazasidagi maxsus referens noutbuk namoyish etildi. Taqdimot davomida qurilmaning DaVinci Resolve kabi turli ilovalar bilan ishlashi ko‘rsatildi, biroq eng katta qiziqishni o‘yinlarni ishga tushirish imkoniyati uyg‘otdi. Xususan, sinov namunasi Control hamda Baldur's Gate 3 o‘yinlarini 1080p piksellar kengaytmasida, o‘rta grafik sozlamalarida va soniyasiga 30 kadr chastotasida ishga tushirishga muvaffaq bo‘ldi. Mutaxassislar o‘yin jarayoni yetarlicha ravon va qotishlarsiz kechganini ta'kidlashdi. Bu ko‘rsatkichlar alohida diskret videokartasiz, asosiy e'tibor batareya quvvatini tejashga qaratilgan yupqa noutbuk uchun muhim natija hisoblanadi.

Bundan tashqari, 23 vatt quvvatga ega Snapdragon X Elite noutbuki Intel Core Ultra 7 155h protsessorli boshqa noutbuk bilan solishtirib ko‘rildi. Geekbench benchmarkining bir yadroli va ko‘p yadroli sinovlarida Qualcomm chipi mos ravishda 15 foiz va 8 foizga tezroq ekanini namoyish etdi. Taqqoslash natijalariga ko‘ra, Snapdragon X Elite sinovlarning barchasida raqobatchisidan ustun kelgan.

Mazkur yangi protsessor o‘rnatilgan ilk noutbuklar yaqin oylar ichida bozorda paydo bo‘lishi kutilmoqda. Avvalroq barcha yirik kompyuter ishlab chiqaruvchi kompaniyalar o‘z qurilmalarida ushbu chipdan foydalanish niyatida ekanliklarini rasman e'lon qilgan edilar.