Windows 11 qidiruv tizimi yangilanmoqda 🔍

Microsoft kompaniyasi Windows 11 operatsion tizimining qidiruv funksiyasini sezilarli darajada yaxshilash bo'yicha ishlar boshlanganini e'lon qildi. Yangilangan qidiruv tizimi yanada tezkor bo'lishi, operativ xotiradan tejamkor foydalanishi hamda foydalanuvchi nimani qidirayotganini yaxshiroq tushunishga moslashtirilishi rejalashtirilgan.

Mazkur yangi qidiruv tizimi Windows 11 uchun zamonaviy interfeys freymvorki hisoblangan WinUI 3 asosida qurilgan. Dastlabki sinovlar unumdorlik va xotiradan foydalanish ko'rsatkichlari sezilarli darajada yaxshilangani, qidiruv yanada tez va samarali sezilayotganini ko'rsatgan. Qidiruv panelining o'zi ham soddalashtirilib, chap tomondagi ro'yxat va o'ng tomondagi oldindan ko'rish oynasi o'rniga yagona ro'yxat shakliga keltirildi, bu esa interfeysni tartibli qiladi.

Kompaniya imlo xatolarini to'g'ri tushunish va tizim sozlamalari nomi noto'g'ri kiritilganda ham nima topishmoqchi bo'lganini taxmin qilish kabi qobiliyatlarni yanada yaxshilash ustida ishlamoqda. Shuningdek, joriy yil oxirigacha qidirilayotgan fayl haqida qo'shimcha ma'lumotlar, jumladan, rasm uchun kichik tasvir, uning o'lchami va hajmini ko'rsatuvchi inline-prev'yular sinovdan o'tkaziladi. "Londondagi ob-havo" kabi so'rovlar Bing yordamida kunlik harorat ma'lumotlarini o'z ichiga olgan maxsus kartochkani chiqarib beradi.

Yana bir muhim yangilik bu Windows 11 qidiruviga "harakatlar" funksiyasining kiritilishidir. Endi foydalanuvchilar qidiruv satrining o'ziga buyruq yozish orqali OS sozlamalarini bevosita o'zgartirishi mumkin. Misol uchun, "qorong'i mavzuga o'tish", "ovozni o'chirish" yoki "ekranni xiralashtirish" kabi buyruqlar yordamida kerakli sozlamalarni qidiruv orqali tezda amalga oshirish imkoni yaratilmoqda.

Biroq, bunday qulay o'zgarishlar foydalanuvchilar orasida turlicha reaksiyalarga sabab bo'lmoqda. Asosiy savollardan biri shundan iboratki, Windows 11 qidiruvi azaldan sekin va noqulay bo'lib kelgani ma'lum bo'lsa-da, nima uchun bu yaxshilanishlar oldinroq amalga oshirilmagan?