ASUS Zenfone 11 Ultra flagmani taqdim etildi 📱

ASUS kompaniyasi ixcham dizayndan butunlay voz kechib, yuqori unumdorlik va yirik displeyga e'tibor qaratgan holda yangi Zenfone 11 Ultra flagman smartfonini taqdim etdi. Mutaxassislarning fikricha, ushbu yangi model o'ziga xos dizayni bilan o'yinlarga mo'ljallangan ROG Phone 8 Pro gadjetini eslatadi, biroq keng ommaviy foydalanuvchilar uchun mo'ljallangan. Smartfon korpusi to'rt xil rangda sotuvga chiqarilib, u mat oynali orqa panel va Gorilla Glass Victus 2 himoya oynasi bilan qoplangan.

Smartfon 6,78 dyuymli ulkan AMOLED E6 displeyi bilan ta'minlangan bo'lib, u FHD+ piksellar sonini va 144 Gts gacha bo'lgan yangilanish chastotasini qo'llab-quvvatlaydi. Ekran yorqinligi qo'lda sozlangan holatda 831 nitni, avtomatik rejimda esa 1773 nitni tashkil qiladi. Qurilma 5500 mA/soat sig'imli batareya va 65 vattli tezkor quvvatlash texnologiyasiga ega. Sinov natijalariga ko'ra, u akkumulyator quvvatini to'liq tiklash uchun 41 daqiqa vaqt sarflaydi.

Asosiy ishlash jarayoni uchun Qualcomm Snapdragon 8 Gen 3 protsessori mas'ul bo'lib, u 12 yoki 16 GB tezkor xotira hamda 256 yoki 512 GB doimiy xotira turlari bilan birgalikda ishlaydi. Yuqori unumdorlik rejimida qurilma benzchmarklarda yuqori natijalarni ko'rsatgan, ammo uzoq muddatli yuklamalarda qizib ketishi mumkinligi sababli standart Dynamic Mode rejimidan foydalanish tavsiya etiladi.

Kamera tizimi uchta datchikdan iborat: 50 megapikselli asosiy Sony IMX890 sensor, 13 megapikselli keng burchakli va 32 megapikselli telefoto linza. Kundungi va tungi suratlar yaxshi chiqishiga qaramay, dasturiy keskinlikning biroz oshib ketishi suratning tabiiyligiga ta'sir qilishi mumkinligi qayd etilgan. Ushbu yangi flagmanning boshlang'ich narxi 899 dollarni tashkil qiladi.