Murena maxfiylikka ixtisoslashgan planshet chiqardi 📱

Murena kompaniyasi foydalanuvchilar maxfiyligini ta'minlashga qaratilgan o'zining ilk Pixel planshetini taqdim etdi va savdosini boshladi. Ushbu yangi qurilma aslida 2023 yilda chiqarilgan Pixel Tablet modelining o'zgartirilgan versiyasi hisoblanadi. Biroq uning asosiy farqi shundaki, gadjet Google xizmatlari va ilovalarisiz taqdim etilgan bo'lib, butunlay shaxsiy ma'lumotlar maxfiyligiga urg'u berilgan.

Standart Android o'rniga Murena Pixel ochiq kodli shaxsiy /e/OS operatsion tizimi boshqaruvi ostida ishlaydi. Qurilmada odatiy Google Play ilovalar do'koni mavjud emas. Buning o'rniga dasturlarni yuklab olish uchun maxsus App Lounge xizmati qo'llaniladi. Ushbu interfeys Play Store do'konidagi bepul ilovalarni hech qanday shaxsiy ma'lumotni oshkor qilmasdan, anonim tarzda ko'rish va yuklab olish imkonini beradi. Shunga qaramay, pulli dasturlarni xarid qilish uchun baribir Google akkauntiga kirish talab etiladi.

Planshet tarkibiga Google dasturiy ta'minotlari ham kiritilmagan. Ularning o'rniga Murena maxfiylik darajasi yuqori bo'lgan o'z muqobillarini taklif etadi. Bular qatoriga elektron pochta, veb-sahifalarni kezish, taqvim, kontaktlar va eslatmalar uchun mo'ljallangan ilovalar kiradi. Shuningdek, foydalanuvchilarga bepul 1 GB bulutli xotira taqdim etiladi. Agar ko'proq joy kerak bo'lsa, xotirani pullik asosda kengaytirish mumkin: 20 GB uchun oyiga 2,5 dollar yoki yiliga 25 dollar, 128 GB uchun esa oyiga 7,5 dollar yoki yiliga 75 dollar to'lash lozim bo'ladi.

Hozirgi kunda 8 GB tezkor va 128 GB doimiy xotiraga ega Murena Pixel planshetini kompaniyaning rasmiy internet-do'konidan xarid qilish mumkin. Ushbu maxfiylikka yo'naltirilgan gadjetning narxi 549 AQSh dollarini tashkil qiladi.