Джаред Падалеки «Пацаны» сериалига қўшилиши мумкин 🎬

Amazon striming xizmatining mashhur «Bolalar» loyihasida yana bir tanish yuz ko‘rinish berishi mumkin. «Super tabiiy» serialida Sem Vinchester rolini gavdalantirgan aktyor Jared Padaleki «Bolalar» shouranneri Erik Kripkidan taklif olganini maʼlum qildi. Qayd etilishicha, Kripke va Padaleki qadimgi tanishlar bo‘lib, aynan Erik «Super tabiiy» shousining yaratuvchisi hisoblanadi. Erik Kripke o‘zining yangi loyihasiga avvalroq Jensen Ekls va Jeffri Din Morgan kabi aktyorlarni ham jalb qilgan edi.

Jared Padaleki «Bolalar» olamiga qo‘shilishga va Kripke bilan yana hamkorlik qilishga qarshi emasligini bildirdi. Biroq, uning so‘zlariga ko‘ra, suratga tushishdan oldin u jiddiy jismoniy tayyorgarlik ko‘rishi va formaga kirib olishi lozim. Aktyorning taʼkidlashicha, uning yoshi va oilaviy ahvoli tufayli bu maʼlum vaqt talab qiladi.

Aktyor o‘zining yoshi va uch nafar farzandi borligini eslatib, yosh yigitlardek har kuni uch soat shug‘ullana olmasligini aytdi. Shuningdek, u suratga olish jarayonida kiyimini yechish talab etilishini bilgan holda, shourannerdan oldindan ogohlantirishni so‘radi. U murabbiy va parhezshunos xizmatidan foydalanish hamda bir necha oy davomida tayyorgarlik ko‘rish uchun vaqt kerakligini qo‘shimcha qildi.

Agar Jared Padaleki ushbu loyihada ishtirok etsa, uning chiqishi eng tezkor holatda serialning beshinchi mavsumiga to‘g‘ri kelishi kutilmoqda. Ayni paytda muxlislar 13 iyunda boshlanadigan to‘rtinchi mavsumni kutmoqda. To‘rtinchi mavsumda tomoshabinlar Jeffri Din Morgan ijro etgan yangi qahramon bilan ham tanishadilar.