Microsoft Chrome brauzerida matn sifatini oshirdi 🔤

Microsoft kompaniyasi Chromium loyihasiga o'zining muhim hissasini qo'shib, Windows qurilmalarida matnni render qilish imkoniyatlarini yaxshiladi. Ko'plab foydalanuvchilarning uzoq yillik shikoyatlaridan so'ng, Chrome 124 versiyasi Windows ClearType matn sozlagichining gamma va kontrast qiymatlarini qo'llab-quvvatlaydigan bo'ldi. Shu tariqa, Chrome shriftlar va matnni render qilish borasida Microsoft o'zining Edge brauzeriga kiritgan yaxshilanishlarga moslasha oldi. Foydalanuvchilar endi veb-sahifalardagi matn o'qilishini yaxshilash uchun matn kontrastini kuchaytirish va gamma tuzatish funksiyalaridan foydalana oladilar.

Tarixan Chrome matnni render qilish uchun Skia tizimidan foydalanib kelgan va unda kontrast hamda gamma uchun qat'iy belgilangan qiymatlar ishlatilgan. Shu sababli u ClearType taqdim etadigan afzalliklardan foydalana olmasdi. Microsoft kompaniyasining ClearType shrift texnologiyasi ekranda matn renderini yaxshilash uchun Windows tizimida uzoq vaqtdan beri qo'llanilib kelinmoqda va u matnni qog'ozga bosilgandek ko'rsatishga harakat qiladi. Microsoft muhandislari ClearType sozlagichini Chrome'ga integratsiya qilishdi, shuning uchun endi u ko'pchilik boshqa Windows ilovalari kabi kontrast va gammadagi har qanday o'zgarishlarni hisobga oladi.

Matn renderini yaxshilash bo'yicha ushbu yo'nalishga Microsoft dasturiy ta'minot ishlab chiqish bo'yicha katta muhandisi Kurt Katti-Schmidt rahbarlik qilmoqda. Shuningdek, u Chrome va Edge brauzerlarida foydalanish imkoniyatlarini yaxshilash ishlarini ham nazorat qiladi.

Mazkur o'zgarishlar Microsoft kompaniyasining Windows tizimlaridagi Chromium brauzerlarini takomillashtirish bo'yicha o'z zimmasiga olgan majburiyatlarining bir qismi hisoblanadi. Bu vazifa kompaniya besh yil oldin o'zining Edge brauzerini Chromium'ga o'tkazgan paytda boshlangan edi. O'shanda Redmond shahridagi kompaniya Windows platformasidagi tajribasini taqdim etish orqali Windows'dagi barcha Chromium asosidagi brauzerlarni yaxshilashga va'da bergan edi va bu va'da o'z kuchida qolmoqda. Microsoft avvalroq Chrome'da sahifalarni aylantirish, sensorli boshqaruvni qo'llab-quvvatlash va Chromium'ning boshqa ko'plab jihatlarini yaxshilashga ham o'z hissasini qo'shgan edi.