Binance mayning-pulini yopmoqda ⛏

Dunyodagi yirik kriptovalyuta birjalaridan biri bo'lgan Binance o'zining mayning-puli faoliyatiga yakun yasashini e'lon qildi. Joriy yilning 10-noyabr sanasidan boshlab mazkur pul qurilmalardan uziladi, shuningdek, birja qazib olish natijalarini hisobga olishni hamda mukofotlar taqdim etishni to'xtatadi.

Qayd etilishicha, asosiy pul bilan birga Cloud Mining bulutli mayning xizmati, Pool Savings jamg'arma mahsuloti va Transaction Accelerator tranzaksiyalar tezlatgichi ham yopiladi. Shu bilan birga, API interfeyslari, xeshreyt bildirishnomalari va boshqa barcha bog'liq funksiyalar o'z faoliyatini to'xtatadi.

Ushbu o'zgarishlar munosabati bilan birja maynerlarga o'z qurilmalarining hisoblash quvvatlarini boshqa pullarga o'z vaqtida yo'naltirishni tavsiya qildi. Bu uskunalar faoliyatida uzilishlar kelib chiqishining oldini olishga yordam beradi. Shuningdek, Pool Savings xizmatida faol pozitsiyalariga ega mijozlarga xizmat ko'rsatish to'xtatilishidan oldin obunani bekor qilib, mablag'larini chiqarib olish so'raldi.

Kompaniya vakillarining ma'lumotiga ko'ra, barcha to'lanmagan mukofotlar, qoldiq mablag'lar va tegishli qaytarishlar xizmat yopilgach, tegishli tekshiruvlar va shartlarga asosan ko'rib chiqiladi. Mayning tarixiy ma'lumotlari, operatsiyalar va to'lovlar 24-noyabrgacha ochiq qoladi, shundan so'ng barcha sahifalar butunlay o'chiriladi.

Ma'lumot uchun, Binance o'z mayning-pulini 2020-yilning aprel oyida ishga tushirgan bo'lib, dastlab faqat Bitcoin qazib olishni qo'llab-quvvatlagan, keyinchalik esa xizmatlar ko'lami kengaytirilgan edi.