Binance mayning-pulini yopishni e'lon qildi ⛏

Dunyodagi yirik kriptovalyuta birjalaridan biri bo'lgan Binance olti yillik faoliyatidan so'ng o'zining mayning-pulini yopishga qaror qildi. Joriy yilning 10-noyabr sanasidan e'tiboran ushbu pul mayning uskunalaridan uziladi, birja uning ish natijalarini hisobga olishni hamda mukofotlar taqdim etishni to'xtatadi.

Mazkur o'zgarishlar faqat asosiy pul bilan cheklanib qolmaydi. Kompaniya ma'lumotiga ko'ra, bulutli mayning xizmati, Pool Savings jamg'arma mahsulotlari, shuningdek, tranzaksiyalarni tezlatgich ham o'z ishini to'xtatadi. Bundan tashqari, API interfeyslari, heshtreyt bildirishnomalari va boshqa turdagi xabarnoma funksiyalari ham yopilishi rejalashtirilgan.

Bunday o'zgarishlar fonida birja maynerlarga o'zlarining hisoblash quvvatlarini boshqa muqobil pullarga o'z vaqtida yo'naltirishni tavsiya qildi. Bu uskunalar faoliyatida kutilmagan tanaffuslarning oldini olishga yordam beradi. Pool Savings xizmatida faol pozitsiyalarga ega bo'lgan mijozlarga esa xizmat ko'rsatish to'xtatilishidan oldin obunani bekor qilib, mablag'larni chiqarib olish maslahat berildi.

Savdo platformasi vakillarining ta'kidlashicha, barcha to'lanmagan mukofotlar, qoldiq mablag'lar va tegishli qaytarish ishlari xizmat yopilgach amalga oshiriladi. Hisob-kitoblar tegishli mahsulot shartlari hamda zarur tekshiruvlar natijalariga ko'ra bajarilishi va'da qilindi. Shuningdek, mayning tarixi, amaliyotlar va to'lovlar haqidagi ma'lumotlar 24-noyabrgacha foydalanuvchilar uchun ochiq qoladi. Ushbu sanadan keyin sahifalar to'liq o'chirilishi sababli foydalanuvchilarga kerakli ma'lumotlarni oldindan saqlab qo'yish tavsiya etildi.

Eslatib o'tamiz, mazkur mayning-puli ilk bor 2020-yilning aprel oyida ishga tushirilgan bo'lib, dastlab faqat bitkoin qazib olishni qo'llab-quvvatlagan, keyinchalik esa xizmatlar turlari kengaytirilgan edi.