Apple sensorli MacBook Ultra’ni taqdim etishi mumkin 💻

Apple kompaniyasi oktabr oyida ikkita alohida taqdimot o‘tkazishga tayyorgarlik ko‘rayotgani ma'lum bo‘ldi. Bloomberg jurnalisti Mark Gurmanning ma'lum qilishicha, ilk tadbir 13-oktyabrga belgilangan bo‘lib, unda uzoq kutilgan yangi uy uchun mo‘ljallangan qurilma, shuningdek, yangilangan HomePod mini va Apple TV 4K taqdim etilishi kutilmoqda.

Oktabr oyining so‘nggi haftasida esa ikkinchi taqdimot bo‘lib o‘tishi rejalashtirilgan. Garchi bu tadbirda qaysi qurilmalar namoyish etilishi hozircha rasman noma'lum bo‘lsa-da, asosiy e'tibor Mac kompyuterlari qatoriga qaratilishi taxmin qilinmoqda.

Xususan, uzoq vaqtdan beri muhokama qilinib kelinayotgan yupqa MacBook Ultra modeli shu taqdimotda yuzaga chiqishi mumkin. Ushbu yangi noutbuk OLED sensorli ekran hamda Dynamic Island funksiyasi bilan jihozlanishi kutilmoqda. Shuningdek, tadbirda M6 chipli 14 dyuymli bazaviy MacBook Pro va yangilangan iMac kompyuterlari ham namoyish etilishi ehtimoldan xoli emas.

Bundan tashqari, oktabr oyidagi yangiliklar qatoridan yangi avlod iPad mini 8 planshati ham joy olishi kutilmoqda. Taxminlarga ko‘ra, ushbu planshet OLED displey, A20 Pro protsessori, gorizontal joylashtirilgan old kamera va yaxshilangan ovoz tizimiga ega bo‘ladi. Biroq uning aniq taqdimot sanasi hozircha noma'lum bo‘lib qolmoqda, ya'ni uni uy qurilmalari bilan birga, Mac taqdimotida yoki butunlay alohida tadbirda ko‘rsatishlari mumkin.