Geely avtogiganti Meizu kompaniyasini sotib oldi 📱

Yil boshidan buyon tarqalgan norasmiy xabarlar nihoyat o'z tasdig'ini topdi. Volvo, Polestar, Lotus hamda Smart kabi mashhur avtomobil brendlariga egalik qiluvchi Xitoyning yirik Geely konserni smartfonlar bozorida o'z kuchini sinab ko'rishga qaror qildi. Ushbu maqsadni amalga oshirish uchun kompaniya Android-gadjetlar va aksessuarlar ishlab chiqarishi bilan tanilgan Meizu brendini o'z tasarrufiga oldi.

Mazkur yirik bitimning moliyaviy tafsilotlari, jumladan uning umumiy qiymati hozircha ochiqlanmagan. Shunga qaramay, xaridni tasdiqlovchi tegishli hujjatlarga imzo chekilgani haqida ma'lumotlar mavjud. Hozircha har ikki tomon rasmiy bayonot bilan chiqmagan bo'lsa-da, kompaniyalarning qo'shilishi haqidagi dastlabki mish-mishlar internet tarmoqlarida bundan yarim yil muqaddam paydo bo'lgan edi.

Ma'lumot o'rnida ta'kidlash joizki, Meizu mutaxassislari tomonidan maxsus Flyme for Car avtomobil tizimi ishlab chiqilgan bo'lib, u Google Android Auto hamda Apple CarPlay platformalariga muqobil sifatida yaratilgan. Xitoylik ishlab chiqaruvchining ushbu mahsuloti bolalar xavfsizligiga alohida e'tibor qaratilgani, salon ichidagi vaziyatni kuzatib borish imkoniyati hamda boshqa hech qayerda uchramaydigan chivinlarni haydash funksiyasi bilan ajralib turadi.

Bundan avvalroq Geely konserni mobil qurilmalar yaratish va ishlab chiqarish maqsadida Hubei Xingji Shidai Technology deb nomlangan alohida sho'ba korxonasini tuzgan edi. Tarqalgan ma'lumotlarga ko'ra, mazkur tuzilmada OPPO, Xiaomi hamda ZTE kompaniyalarining sobiq top-menejerlari faoliyat yuritmoqda. Qolaversa, kompaniya o'z smartfonlari uchun bir nechta dizayn variantlarini ham patentlashga ulgurgan.