Windows 11 muvaffaqiyatsizlikka uchradimi? 💻

Ishga tushirilganiga uch oydan oshgan Microsoft Windows 11 operatsion tizimi bozorda kutilgan natijani ko‘rsatmadi va mutaxassislar tomonidan muvaffaqiyatsizlik sifatida baholanmoqda. O‘n milliondan ortiq shaxsiy va tijoriy kompyuterlarni qamrab olgan Lansweeper tadqiqot natijalariga ko‘ra, so‘rovda qatnashgan foydalanuvchilarning atigi 0.21 foizdan kami bepul taqdim etiladigan Windows 10 versiyasidan yangisiga o‘tgan xolos.

Bozorning bunday sovuqqon munosabatiga bir nechta omillar sabab bo‘lishi mumkin. Ulardan biri — keskin apparat talablari bo‘lib, Windows 11 ishlashi uchun maxsus TPM 2.0 moduli talab qilinadi. Bu esa 2018-yildan oldin ishlab chiqarilgan kompyuter egalarini chetlab o‘tishga majbur qiladi yoki foydalanuvchilardan qo‘shimcha choralarni talab etadi. Shuningdek, interfeysdagi ayrim kamchiliklar, Windows 10'ga nisbatan unchalik qulay bo‘lmagan Start menyusi va turli xatoliklar ham bunga ta'sir ko‘rsatgan bo‘lishi ehtimoldan xoli emas.

Lansweeper taqdim etgan ma’lumotlarga tayanilsa, eski va qo‘llab-quvvatlashdan qolgan Windows XP, Vista hamda Windows 8 kabi tizimlardan foydalanuvchilar soni Windows 11 foydalanuvchilaridan ko‘p bo‘lishi mumkin. Bu esa o‘z navbatida katta xavfsizlik xavfini tug‘diradi, chunki Microsoft bu tizimlar uchun muntazam xavfsizlik yangilanishlarini chiqarmaydi. Boshqa tomondan, Windows 10 uchun xavfsizlik yangilanishlari 2025-yilning o‘rtalariga qadar davom etadi.

Ushbu muddat foydalanuvchilarga o‘z qurilmalarini yangi tizim talablariga moslashtirish yoki Windows 11'ga o‘tish bo‘yicha qaror qabul qilish uchun yetarli vaqt beradi. Shu bilan birga, Microsoft kompaniyasi Windows 11 interfeysini yaxshilash ustida ham ishlamoqda. Xususan, 22509-sonli sinov yig‘masida Start menyusiga qo‘shimcha ilovalarni qistirib qo‘yish va tavsiyalar uchun ko‘proq joy ajratish imkoniyatlari taqdim etilgan.