Ledger maxфиiy qurilmalar tekshirilmoqda 🔍

Apparat ko‘rinishidagi raqamli hamyonlar tayyorlovchi Ledger kompaniyasi Janubi-Sharqiy Osiyo mamlakatlarida faoliyat yurituvchi CryptoBilis dileri orqali sotilgan qurilmalar egalarining mablag‘lari o‘g‘irlangani haqidagi xabarlarni o‘rganishni boshladi. Rasmiy vakillarning ma’lum qilishicha, bunday qurilmalarning biridan begona apparat elementi aniqlangan. Bitquery tahliliy kompaniyasi ma’lumotlariga ko‘ra, maxsus qurilgan "zakladkalar" orqali hujumchilar 315 ta hamyondan 93,2 million dollarga yaqin mablag‘ni qo‘lga kiritgan bo‘lishi mumkin.

Mablag‘lar yo‘qolgani haqidagi dastlabki ma’lumotlar o‘tgan hafta oxirida X va Reddit ijtimoiy tarmoqlarida paydo bo‘ldi. Shundan so‘ng oncheyn-tadqiqotchilar shubhali manzillarni aniqlab, Bitcoin, Ethereum hamda Tron tarmoqlaridagi tranzaksiyalarni kuzatib borishdi. O‘z navbatida, 2026 yil 9 oktyabr kuni Ledger vakillari Indoneziya, Malayziya va Filippinda ishlaydigan CryptoBilis mijozlarining shikoyatlari tekshirilayotganini tasdiqlashdi. Shu bilan birga, kompaniyaning o‘z infratuzilmasi zarar ko‘rmagani va to‘g‘ridan-to‘g‘ri ishlab chiqaruvchidan xarid qilgan mijozlardan shikoyat kelib tushmagani ta’kidlandi.

Tekshiruv davomida CryptoBilis kompaniyasidan savdo va yetkazib berish jarayonlarini vaqtincha to‘xtatib turish so‘raldi. So‘nggi 90 kun ichida ushbu dilerdan qurilma sotib olgan foydalanuvchilarga ularni sozlamaslik tavsiya qilindi. Hamyonni allaqachon faollashtirib ulgurganlarga esa aktivlarni yangi seed-frazaga ega boshqa qurilmaga ko‘chirish masalasini ko‘rib chiqish uqtirildi. Bitquery mutaxassislari hujum oltita blokcheyn tarmog‘ini qamrab olgani va tayyorgarlik jarayonida test amaliyotlari o‘tkazilganini aniqlashdi.

Hujumchilar o‘g‘irlangan mablag‘larning bir qismini Tornado Cash mikseri va Zcash orqali yuvishga harakat qilgan. Shunga qaramay, Tether kompaniyasi hujumga aloqador 20 ta manzil bo‘yicha 10 million USDTni muzlatib qo‘ydi, yana 5,35 million USDC miqdoridagi aktivlar aniqlanib, ularni Circle tomonidan bloklash imkoniyati ko‘rib chiqilmoqda. Ledger vakillari jabrlangan foydalanuvchining hamyonini o‘rganishda davom etmoqda.